65 нафар юк ташувчи қонуний фаолиятга ўтди
Юк ташиш иқтисодиётнинг деярли барча тармоқларини бир-бирига боғлаб турадиган муҳим хизмат турларидан бири. Шу боис соҳада фаолиятнинг қонуний ва шаффоф йўлга қўйилиши ҳам хизмат кўрсатувчилар, ҳам буюртмачилар учун муҳим аҳамиятга эга.
Сирдарё вилоятида бу йўналишда олиб борилаётган ишлар натижасида 65 нафар фуқаро юк ташиш фаолиятини расмийлаштириб, якка тартибдаги тадбиркор сифатида давлат рўйхатидан ўтди.
Айни пайтда вилоят ЙҲХБ да 11 минг 808 та юк транспорти воситаси рўйхатга олинган. Уларнинг 9 минг 418 таси жисмоний шахсларга тегишли. 1 сентябрь ҳолатига кўра, улардан 729 нафари расмий тадбиркор сифатида фаолият юритган.
Бу кўрсаткич соҳада фаолиятни расмийлаштириш бўйича тушунтириш ишларини янада кучайтириш зарурлигини кўрсатмоқда. Шу мақсадда вилоят прокуратураси, солиқ бошқармаси, ЙҲХБ ҳамда Транспорт назорати инспекцияси ҳамкорлигида профилактик тадбирлар ўтказилди.
Уларда юк ташиш билан шуғулланаётган фуқароларга фаолиятни расмийлаштириш тартиби, қонуний ишлашнинг афзалликлари ва бу борада яратилган имкониятлар тушунтирилмоқда. Бунда асосий эътибор фуқарони жазолашга эмас, балки унинг меҳнатини қонуний асосга ўтказиш ва тадбиркорлик фаолиятини барқарор йўлга қўйишига кўмаклашишга қаратилган.
— Юк ташиш соҳасида қонунийликни таъминлаш, аввало, тадбиркорнинг ўз фаолиятини эркин ва барқарор юритиши учун муҳим. Фаолиятини расмийлаштирган юк ташувчи буюртмачилар билан қонуний шартнома асосида ишлаши, банк хизматларидан фойдаланиши ва меҳнат фаолиятини расмий юритиши мумкин. Шунинг учун бугунги вазифа фақат рўйхатдан ўтказиш эмас, балки юк ташувчиларга қонуний фаолиятнинг афзалликларини тушунтириш ва зарур кўмакни кўрсатишдан иборат, — деди Сирдарё вилояти солиқ бошқармаси шуъба бошлиғи Илғор Халилов.
Қонуний фаолият юритиш юк ташувчига расмий шартномалар тузиш, йирик ташкилотлар билан ҳамкорлик қилиш, банк хизматларидан фойдаланиш, меҳнат стажини шакллантириш ва келгусида пенсия таъминотига эга бўлиш имконини беради.
Ғулом Примов, ЎзА мухбири
