1,5 гектар ер учун 750 минг доллар сўраган шахс ушланди

Давлат хавфсизлик хизматининг Тошкент вилояти бўйича бошқармаси ва Иқтисодий жиноятларга қарши курашиш департаменти ходимлари томонидан ер майдонини ноқонуний расмийлаштириб бериш билан боғлиқ ҳолат фош этилди.

Хусусан, Тошкент шаҳрида яшовчи, 1979 й.т. шахс тадбиркорлик билан шуғулланмоқчи бўлган фуқаронинг ишончига кириб, Янгийўл туманида жойлашган ҳамда давлат захирасида бўлган 1,5 гектар ер майдонини архитектура ва кадастр тизимларида ишловчи мансабдор танишлари орқали унинг номига расмийлаштириб бериш эвазига 750 минг АҚШ доллари талаб қилган.

Ўтказилган тезкор тадбирда қонунбузар сўралган пул маблағи ҳисобидан олдиндан 20 минг АҚШ долларини олган вақтида ашёвий далиллар билан ушланди.

Ҳозирда унга нисбатан жиноят иши қўзғатилиб, тергов ҳаракатлари олиб борилмоқда.

Ҳурматли фуқаролар, кундалик ҳаётда шу каби қонунбузилиш ҳолатларига дуч келсангиз ДХХнинг 1520 қисқа рақамига қўнғироқ қилиб, хабар беринг. Шахсингизнинг сир сақланиши кафолатланади.