Зеленский: Жангларни ҳозирги фронт чизиғида тўхтатиш – тинчлик сари энг реал қадам
Украина президенти Владимир Зеленский Россия билан низони тўхтатишнинг энг реал йўли сифатида ҳозирги фронт чизиғида жангларни тўхтатишни таклиф қилди. Унинг таъкидлашича, бу ўт очишни тўхтатиш бўйича музокараларга йўл очиши мумкин.
Зеленский “Fox News” телеканалига берган интервьюсида Киев музокараларнинг исталган шаклига тайёрлиги, бироқ Украина тақдирига оид келишувлар мамлакат иштирокисиз муҳокама қилинмаслиги кераклигини билдирди.
У ҳар қандай тинчлик келишуви АҚШ ва Европадаги ҳамкорлар томонидан хавфсизлик кафолатлари билан таъминланиши зарурлигини айтди. Бу кафолатлар келажакда босқин ва ҳужумлар такрорланишининг олдини олишга хизмат қилиши керак.
Баёнот АҚШ махсус вакили Стив Уиткофф Санкт-Петербургда Россия президенти Владимир Путин билан музокара ўтказган пайтда янгради. Шу билан бирга, Киев Украина ҳарбийлари фойдаланадиган “SpaceX”нинг “Starshield” ва “Starlink” сунъий йўлдош алоқа хизматларидаги чекловлардан хавотир билдирмоқда.
Мусулмон Зиё, ЎзА
