Өзбекстан мен Ресей сыбайлас жемқорлыққа қарсы күрес саласындағы ынтымақтастықты нығайады
17 сәуір күні Өзбекстан Республикасының Сыбайлас жемқорлыққа қарсы күрес агенттігінде Ресей Федерациясы Президентінің көмекшісі Дмитрий Миронов бастаған делегациямен кездесу өтті.
Келіссөздер барысында тараптар сыбайлас жемқорлыққа қарсы мемлекеттік саясатты қалыптастыру және іске асыру бағытындағы практикалық тәжірибелерімен бөлісті. Сонымен қатар осы саладағы екіжақты ынтымақтастықты кеңейту мүмкіндіктері талқыланды.
Кездесу соңында Өзбекстанның Сыбайлас жемқорлыққа қарсы күрес агенттігі мен Ресей Федерациясы Президентінің Мемлекеттік қызмет, кадрлар және сыбайлас жемқорлыққа қарсы іс-қимыл мәселелері жөніндегі басқармасы арасында өзара ынтымақтастық туралы меморандумға қол қойылды.
Аталған құжат саладағы тәжірибе мен ақпарат алмасуды кеңейтуге, сондай-ақ ынтымақтастықты жүйелі түрде дамытуға бағытталғаны атап өтілді.
Меморандум аясында заңнамалық, ғылыми-зерттеу және талдамалық материалдармен тұрақты алмасу, бірлескен семинарлар мен тренингтер ұйымдастыру, қызметкерлердің біліктілігін арттыру, халықаралық бастамаларды ілгерілету сияқты басым бағыттар бойынша әріптестік жолға қойылады.
[gallery-28816]
Сапар аясында Ресей делегациясы Президент жанындағы Мемлекеттік саясат және басқару академиясында болып, мемлекеттік қызметшілердің сыбайлас жемқорлыққа қарсы білімін үздіксіз арттыру жүйесімен танысты.
Сондай-ақ Өзбекстан Республикасы Президентінің кеңесшісі Ғофуржон Мирзаев ресейлік қонақтармен кездесіп, мемлекеттік басқару саласындағы ынтымақтастықты одан әрі дамыту мәселелерін талқылады.
Бұдан бөлек, делегация Басқару тиімділігі агенттігі жанындағы Басшы кадрларды бағалау орталығының қызметімен танысты. Мемлекет басшысының бастамасымен құрылған бұл орталық мемлекеттік органдар үшін кәсіби кадрлық резерв қалыптастыруға және басқару әлеуетін арттыруға қызмет етіп отыр.
Қонақтарға мемлекеттік қызметшілердің сыбайлас жемқорлыққа қарсы тұрақтылық деңгейін бағалау жүйесі туралы кеңінен ақпарат берілді. Аталған жүйе негізінде бүгінге дейін түрлі деңгейдегі 800-ден астам басшының қызметі бағаланғаны атап өтілді.
Сонымен қатар ресейлік делегация мүшелері Ташкент қаласының Шайхантахур ауданындағы «Янги Камолон» махалласында енгізілген халықпен жұмыс істеудің, ашықтық пен айқындықты қамтамасыз етудің заманауи тәсілдерімен танысты.
суреттерді түсірген Ф.Абдурасулов, ӨзА
