Ёш ўзбек режиссёрлари халқаро майдонга чиқмоқда (+видео)
Франциянинг Канн шаҳри дунё кино саноатининг энг нуфузли манзилларидан бири ҳисобланади. Бу ерда қўлга киритилган ҳар қандай ютуқ оддий мукофот эмас, балки ижодкор учун халқаро эътироф рамзи сифатида қабул қилинади. Бу сафар ҳам Канндан келган хабар юртимиздаги кино мухлислари ва санъат аҳлини бефарқ қолдирмади. Ўзбекистонлик киноижодкорлар томонидан суратга олинган “Қадам. Қуёш боласи Юсуф” қисқа метражли фильми халқаро майдонда юксак баҳога сазовор бўлиб, энг олий мукофот — Гран-прини қўлга киритди.
Орадан кўп ўтмай, ушбу халқаро муваффақият давлат даражасида ҳам муносиб эътироф этилди. Президент фармони билан фильм ижодкорлари — режиссёр ва сценарист Суҳроб Қодиров ҳамда режиссёр Дилшодбек Усмонов “Келажак бунёдкори” медали билан тақдирланди. Бу нафақат икки ижодкор меҳнатига берилган баҳо, балки мамлакатимизда кино соҳасига қаратилаётган эътиборнинг яна бир амалий ифодаси сифатида баҳоланмоқда.
Бугун, 20 май куни Тошкент халқаро аэропортида халқаро кинофестивал ғолибларини тантанали кутиб олиш маросими бўлиб ўтди. Аэропортдаги муҳит одатий кутиб олиш маросимидан кўра кўпроқ катта ютуқ билан қайтган жамоани қарши олиш лаҳзаларини эслатди. Гуллар, қутловлар, фотокамералар чақнаши ва самимий олқишлар — барчаси ижодкорларга бўлган ҳурмат ифодасига айланди.
Маросимда маданият ва санъат соҳаси вакиллари, давлат ташкилотлари мутасаддилари, кино ихлосмандлари ҳамда оммавий ахборот воситалари ходимлари иштирок этди. Тадбир давомида Президент фармони асосида “Келажак бунёдкори” медаллари маданият вазири Озодбек Назарбеков томонидан тантанали равишда топширилди.
“Қадам. Қуёш боласи Юсуф” фильмининг халқаро муваффақияти унинг мавзуси билан ҳам боғлиқ. Асарда Даун синдроми билан туғилган Юсуфнинг ҳаёти, унинг орзулари ва онаси Зилоланинг фарзандининг жамиятда муносиб ўрин эгаллаши учун кураши тасвирланган. Фильм инсон қадри, меҳр, бағрикенглик ва жамиятдаги қабул қилиш масалаларини ўзига хос бадиий ифода орқали очиб беради.
Фильм Канндаги асосий танлов даврида бўлиб ўтган “ENTRE DEUX CANNES” 17-халқаро инклюзив кинофестивалида иштирок этди. Мазкур фестиваль имконияти чекланган инсонлар ҳаёти, инклюзия ва инсонпарварлик ғояларини ёритувчи фильмларни қўллаб-қувватлашга ихтисослашган халқаро майдон ҳисобланади.
2026 йилги кино мавсуми учун юзлаб фильмлар тақдим этилган бўлса-да, сараланган ишлар орасидан айнан ўзбек ижодкорларининг фильми энг юқори баҳога муносиб деб топилди.
Бугунги муваффақиятни фақат бир фильм ёки бир мукофот доирасида баҳолаш қийин. Чунки бу натижа ўзбек киносининг халқаро саҳнадаги янги қадами, ёш ижодкорларга берилган ишонч ва миллий кинонинг дунё майдонидаги имкониятлари янада кенгайиб бораётганини кўрсатади.
<iframe width="650" height="420" src="https://www.youtube.com/embed/CUYXgyw0F1A" title="Yosh o`zbek rejissyorlari xalqaro maydonga chiqmoqda " frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>М.Эшмирзаева, У.Тўхтаев, ЎзА
