Ёлғон ваъда учун 65 миллион сўм олди, лекин...

Жиззах вилоятининг Зарбдор туманида хорижда ишлаш орзусидан фойдаланиб, фирибгарлик қилган шахснинг қилмиши фош этилди. “Қинғир ишнинг қийиғи қирқ йилдан кейин ҳам чиқади” деганларидек, алдов ортидаги ҳақиқат барибир юзага чиқди.

Терговга қадар текширувда аниқланишича, Х.У. исмли шахс фуқаро А.Н.нинг ишончига кириб, унинг ўғлини Корея Республикасига ишга жўнатишни ваъда қилган. Бу “хизмат” учун у 65 миллион сўмни қўлга киритган. Аслида эса бу ваъда ҳеч қандай асосга эга бўлмаган.

Ҳолат юзасидан Жиноят кодексининг 168-моддаси билан жиноят иши қўзғатилди. Қонунга кўра, бундай қилмиш жазосиз қолмайди — айбдорга нисбатан тегишли ҳуқуқий чоралар қўлланилиши муқаррар.

Бу воқеа яна бир бор шуни кўрсатмоқдаки, осон йўл излаб, шубҳали таклифларга ишониш кўпинча афсус билан якун топади. “Ёлғоннинг умри қисқа” деган нақл бежиз айтилмаган.

Мутахассислар чет элда ишлашни истаган фуқароларни фақат расмий манбаларга, хусусан, Миграция агентлигига мурожаат қилишга чақирмоқда. Зеро, қонуний йўл — хавфсизлик ва кафолат демакдир.

Абдужалол Қаюмов, ЎзА мухбири