"WBA" профессионал боксчимизга чемпионлик жангини тақдим этмоқда
Жаҳон бокс ассоциацияси ("WBA") мексикалик энг ўрта вазн тоифасидаги жаҳон чемпиони Хайме Мунгияга ҳамюртимиз Бектемир Мелиқўзиевга қарши мажбурий ҳимоя жангига буюртма берганлигини эълон қилди.
“WBA” ҳар икки боксчининг жамоаси тегишли буйруқни қабул қилганлигини тасдиқлади. Улар жорий йил 21 октябргача жанг шартлари бўйича тегишли келишувга эришишлари лозим.
Мунгия жорий йил 2 май куни ўтказилган профессионал бокс оқшомида ҳамюрти Хосе Армандо Ресендизни очколар ҳисобида мағлуб этиб, чемпионлик камарини қўлга киритганди.
Айтиш лозимки, мексикалик Мунгия профессионал боксда 46 та жанг ўтказиб, 2 тасида мағлубият, 44 тасида ютуққа эришган.
2016 йилги ёзги Олимпия ўйинлари совриндори, профессионал боксда 17 та жангда рингга кўтарилиб, 16 тасида ғалабага эришган Бектемир Мелиқўзиев “WBA”нинг энг ўрта вазн тоифасида биринчи рақамли ва расмий мажбурий даъвогар ҳисобланади.
Эслатиб ўтамиз, истеъдодли боксчимиз Бектемир Мелиқўзиев шу йилнинг февраль ойида АҚШнинг Лас-Вегас шаҳрида ўтган сўнгги жангида америкалик Сена Агбекони еттинчи раундда нокаутга учратганди.
Т. Рўзиев, ЎзА
