Вьетнамда велошоссе бўйича поёнига етган "BIWASE Tour of Vietnam" мусобақасида мамлакатимиз вакиллари муносиб натижаларни қайд этиш асносида катта тажриба тўплашга муваффақ бўлди.
Халқаро турнирнинг турли йўналишларида дунёнинг 30 га яқин давлатидан энг маҳоратли велоспортчилар қатнашган баҳсларда терма жамоамиз аъзоси Янина Кускова аёллар ўртасида 50 километр масофага критериум (гуруҳ пойгаси) дастурида тенгсиз эканини намойиш этди.
Кускова ҳар бир финишни ўз фойдасига ҳал қилди. Асосий 10-айланадаги баҳсда ҳам Янина катта устунлик билан маррага биринчи бўлиб етиб келди.
Шунингдек, турнирнинг этап босқич мусобақаларида Кускова икки марта 3-ўринни эгаллаган бўлса, терма жамоамиз аъзоларидан Нафосат Қозиева, Мадина Қаҳҳорова, Яна Мишинова ёшлар ўртасида ва умумий пойгаларда тегишли вақт кўрсаткичларига эришиб, халқаро рейтинг учун қимматли очколарни жамғарди.
Эслатиб ўтамиз, ҳамюртимиз Янина Кускова 110 километр масофага мўлжалланган “Women Elite” пойгасида 3-ўринни банд этган эди.
Т.Рўзиев,
ЎзА