Туризм салоҳиятини тарғиб қилишнинг истиқболли йўналиши
Нукусда Қорақалпоғистон Республикасида туризмни ривожлантириш бўйича Мувофиқлаштирувчи кенгашнинг навбатдаги йиғилиши бўлиб ўтди.
Унда давлат органлари, туризм саноати, бизнес ҳамжамиятлари, туроператорлар, умумий овқатланиш объектлари, шунингдек, жамоат ташкилотлари вакиллари иштирок этди.
Йиғилишда минтақада туризм соҳасини янада ривожлантириш, туризм маҳсулотларини такомиллаштириш, давлат ва бизнес ўртасидаги ҳамкорликни мустаҳкамлаш, шунингдек, туризм хизматлари сифатини ошириш масалалари кўриб чиқилди.
Йиғилишда лойиҳаларни қўллаб-қувватлаш нафақат жамоат ташкилотлари ташаббусларини рўёбга чиқариш, балки туризм ва умумий овқатланиш соҳаларида замонавий ёндашувларни жорий этиш, хизматлар сифатини ошириш ҳамда маҳаллий тадбиркорлар учун янги имкониятлар яратишга хизмат қилиши қайд этилди.
[gallery-31273]
Тадбирда “DMO Karakalpakstan” жамоат бирлашмаси томонидан Ўзбекистон Республикаси Олий Мажлиси ҳузуридаги Фуқаролик жамияти институтларини қўллаб-қувватлаш жамоат фондининг ижтимоий буюртмаси бўйича амалга оширилган “QR Gastronomic Quality” лойиҳасини амалга ошириш натижалари тақдим этилди. Лойиҳа доирасида истеъмолчиларнинг афзалликларини ўрганиш, умумий овқатланиш соҳаси вакиллари учун ўқув семинарлари ва тренинглар ўтказилди. Хизмат кўрсатиш сифатини ошириш бўйича тавсиялар ишлаб чиқилди ва Қорақалпоғистон Республикасининг 30 дан ортиқ умумий овқатланиш объектида жорий этилган “QR Gastronomic” электрон платформаси ва мобил иловаси яратилди.
Йиғилиш давомида лойиҳа доирасида ўтказилган танлов ғолибларининг Малайзияга танишув сафари ҳам тақдим этилди. Ғолиб учта ресторан вакили мамлакатнинг етакчи ресторан саноат объектларига ташриф буюриб, гастрономик туризмни ривожлантиришнинг халқаро амалиёти ва ресторан бизнесини ташкил этишнинг замонавий ёндашувлари билан танишдилар. “Michelin Guide”нинг битта юлдузи билан тақдирланган “Beta KL” ресторанига ташриф, шунингдек, “Tourism Malaysia” вакиллари билан учрашув алоҳида қизиқиш уйғотди, унда иштирокчилар мамлакатнинг туризм салоҳиятини тарғиб қилиш тажрибасини ўргандилар.
Ғолиб ресторанлар вакиллари ташриф якуни бўйича Қорақалпоғистонда илғор халқаро тажрибаларни жорий этиш бўйича ўз билимлари ва таклифлари билан ўртоқлашдилар.
“Қорақалпоқ пазандачилик санъати” жамоат бирлашмаси директори Гулмирза Юлдашев миллий пазандачилик меросини асраб-авайлаш ва тарғиб қилишда гастрономик фестивалларнинг аҳамияти ҳақида сўзлаб берди. Унинг таъкидлашича, бундай тадбирлар нафақат гастрономик туризмни ривожлантиришга, балки минтақанинг ижобий имижини шакллантиришга ҳам хизмат қилади.
Қорақалпоғистонлик туроператорлар туристик маршрутларни янада ривожлантириш бўйича ўз таклифларини билдирди. Муҳокама давомида гастрономик объектлар, миллий таомлар ва маҳаллий ошпазлик анъаналарини киритиш орқали туристик маҳсулотларни кенгайтириш имкониятлари кўриб чиқилди, бу эса минтақанинг сайёҳлик таклифларини ҳам ички, ҳам хорижий сайёҳлар учун янада жозибадор қилади.
Очиқ мулоқот ўзаро тажриба алмашиш, амалга оширилган лойиҳаларнинг амалий натижаларини тақдим этиш, Оролбўйида туризм соҳасини барқарор ривожлантиришга қаратилган янги ташаббусларни муҳокама қилиш учун самарали майдонга айланди.
Довуд Абибуллаев, Мақсад Ҳабибуллаев (сурат), ЎзА мухбирлари
