Трамп әуежай қызметкерлеріне қолдау көрсетті
АҚШ президенті Дональд Трамп әуежай қауіпсіздігі қызметкерлерінің жалақысына қатысты жаңа жарлыққа қол қойды. Бұл шешім Конгресстегі келіспеушіліктер салдарынан туындаған дағдарыс жағдайында қабылданды.
Белгілі болғандай, ішінара «shutdown» салдарынан мыңдаған маман жалақысыз жұмыс істеуге мәжбүр болған, шамамен 500 қызметкер жұмыстан кеткен. Нәтижесінде ел бойынша әуежайларда ұзын-сонар кезектер пайда болып, рейстердің кешігуі жиілеген.
Ақ үй бұл қадамды уақытша шешім ретінде қарастырып отыр. Ал жүйені заңнамалық деңгейде толық қаржыландыру мәселесі әлі де ашық күйінде қалып отыр.
Демократтар мен республикашылар арасындағы тартыс негізінен көші-қон саясаты төңірегінде өрбуде. Осыған байланысты қауіпсіздік органдарын қаржыландыру бойынша келісім әлі күнге дейін қабылданбады.
Сарапшылар мәселе жақын арада шешілмесе, кейбір шағын әуежайлардың жабылуы және әуе қатынасындағы үзілістердің күшеюі мүмкін екенін ескертуде.
