Тошкентда қиличбозлик бўйича жаҳон кубоги якунланди
Пойтахтимиздаги “Олимпия шаҳарчаси”да қиличбозликнинг сабля йўналиши бўйича аёллар ўртасида жаҳон кубоги босқичи ўз якунига етди.
Мусобақада мамлакатимиз қиличбозларидан ташқари, АҚШ, Хитой, Япония, Корея Республикаси, Қозоғистон, Саудия Арабистони, Венесуэла, Чили ва бошқа мамлакатлардан келган спортчилар яккалик ва жуфтлик баҳсларида рақобатлашди.
Жаҳон кубогининг сўнгги кунида жуфтлик баҳслари бўлиб ўтди. Унда 32 жамоа иштирок этди ва FIE байроғи остида иштирок этган Россия терма жамоаси барча рақибларини ортда қолдириб, олтин медаль ва жаҳон кубогини қўлга киритди. Америка Қўшма Штатлари ва Япония термалари кучли учликдан жой олди.
Эслатиб ўтамиз, мусобақанинг яккалик баҳсларида FIE байроғи остида иштирок этган нейтрал спортчи Алина Михайлова биринчи ўринни эгаллади. Иккинчи ўрин эса болгариялик Йоана Илиевага насиб этди. Озарбайжон шарафини ҳимоя қилган Палина Каспярович ҳамда хитойлик Рао Сюэй шоҳсупанинг учинчи поғонасидан ўрин олди.
Жавоҳир Тошхўжаев,
ЎзА
