Тошкент–Хива йўналишида янги тезкор қатнов йўлга қўйилди (+видео)
Тошкент ва Хива ўртасидаги темирйўл қатновида янги босқич бошланди. “Жалолиддин Мангуберди” номли янги тезюрар поезд илк қатновини амалга ошириб, пойтахт ва қадимий Хоразм диёрини янада яқинлаштирди.
Мазкур тезюрар электропоезд Жанубий Кореянинг "Hyundai Rotem" компанияси томонидан ишлаб чиқарилган бўлиб, 7 вагондан иборат. Таркиб бир вақтнинг ўзида қарийб 390 нафар йўловчини ташишга мўлжалланган. Поезд 250 км/соат тезликка чиқа олади ҳамда Тошкент ва Хива ўртасидаги 1 минг 100 километрлик масофани 14-15 соатда эмас атиги 7,5 соатда босиб ўтди.
Поезд ичидаги муҳит ҳам одатдаги сафарлардан фарқ қилади. Кимдир ойнадан ортда қолаётган манзараларни кузатган бўлса, яна кимдир ушбу тарихий лаҳзани телефон камерасига муҳрлади. Йўловчилар орасида хорижлик сайёҳларнинг кўплиги эса янги йўналиш туризм учун ҳам катта имконият бўлишидан дарак беради.
Янги йўналиш хорижлик сайёҳлар учун катта қизиқиш уйғотган бўлса, поезднинг илк йўловчилари орасида узоқ йиллардан буён ушбу йўналишда қатнаб келаётган юртдошларимизнинг қувончи чексиз.
Дархақиқат, поезднинг ички қисми замонавий ва қулай шароитлари билан йўловчилар эътиборини тортди. Кенг ва юмшоқ ўриндиқлар, электрон ахборот панельлари, телефонларни қувватлаш имконияти ҳамда мўтадил иқлимни таъминловчи тизимлар сафар давомида йўловчилар учун қўшимча қулайлик яратди.
Йўналиш давомида поезд Самарқанд, Бухоро ҳамда Урганч темир йўл вокзалларида тўхтаб ўтди. Хоразмликлар қувончига шерик бўлган юртдошларимиз янги поездни ҳурсандчилик ва ўзгача кайфият билан қарши олишди.
Бугун йўлга қўйилган ушбу қатнов йўловчилар учун вақт тежалиши, қулайлик ва замонавий хизматлар билан ажралиб турадиган янги транспорт имкониятини тақдим этди. Энг муҳими, у пойтахт ва Хоразм воҳаси ўртасидаги сафарни янада тезкор ва қулай қилишга эришди.
Мазкур йўналишнинг йўлга қўйилиши ҳудудлар ўртасидаги транспорт алоқаларини мустаҳкамлаб, йўловчилар учун қулай ва тезкор сафар имкониятларини кенгайтиради.
<iframe width="640" height="420" src="https://www.youtube.com/embed/V8XrQhghEII" title="Toshkent–Xiva yo`nalishida yangi tezkor qatnov yo`lga qo`yildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Феруза Султонова,
Нозимжон Мардонов, Салимжон Обиджонов, ЎзА
