Ташкенттен Ереванға әуе бағыты ашылады
Көпжылдық үзілістен кейін Ташкент пен Ереван қалаларын байланыстыратын тікелей әуе рейсі қайта жанданады. Бұл қадам өңірлік байланыстар үшін жаңа мүмкіндіктерге жол ашады.
Uzbekistan Airports баспасөз қызметінің хабарлауынша, мамыр айында «Ташкент – Ереван» тұрақты жолаушылар рейсін қайта іске қосу жоспарланып отыр.
Ұшулар аптасына бір рет Boeing 737 ұшағымен жүзеге асырылады. Жаңа бағыттың ашылуы екі ел арасындағы туризм мен іскерлік байланысты дамытуға серпін береді.
Осы уақытқа дейін азаматтар Ереванға жету үшін Мәскеу, Ыстамбұл немесе Тбилиси арқылы ұшуға мәжбүр болатын. Енді тікелей рейс арқылы уақыт пен қаржыны үнемдеуге мүмкіндік туады.
Аталған бағытта тасымалдаушы ретінде «Shirak Avia» компаниясы қызмет көрсетеді. Бұл әуе компаниясы Звартноц халықаралық әуежайы базасында орналасқан және заманауи әуе кемелері арқылы жолаушыларға сапалы қызмет ұсынып келеді.
