Tarixiy tashrif: strategik sheriklik va geoiqtisodiy yuksalishning yangi bosqichi
Munosabat
O‘zbekiston Respublikasi Prezidenti Shavkat Mirziyoyevning Gruziyaga amalga oshirgan davlat tashrifi nafaqat ikki tomonlama aloqalar, balki keng makon – Markaziy Osiyo va Kavkaz mintaqalari integratsiyasi tarixida mutlaqo yangi sahifa ochdi.
So‘nggi 23 yil ichida ilk bor kuzatilgan ushbu tarixiy tashrif ikki davlatning siyosiy irodasi, iqtisodiy salohiyati va geostrategik maqsadlari mushtarak ekanligini yaqqol namoyish etdi. Tbilisida imzolangan Strategik sheriklik munosabatlarini o‘rnatish to‘g‘risidagi deklaratsiya hamda davlatimiz rahbarining Gruziya oliy mukofoti – “Oltin mo‘yna” ordeni bilan taqdirlanishi bu ishonchning oliy e’tirofidir.
Uzoq tanaffusdan so‘ng amalga oshirilgan ushbu uchrashuv O‘zbekiston va Gruziya iqtisodiyoti uchun kuchli drayver vazifasini o‘taydi. Oxirgi yillarda o‘zaro tovar ayirboshlash hajmi 270 million dollarga yetgan bo‘lsa, endilikda bu ko‘rsatkichni yaqin yillarda 1 milliard dollarga yetkazish bo‘yicha “yo‘l xaritasi” qabul qilindi. Gruziyaning yetakchi “TBC” banki O‘zbekistonda muvaffaqiyatli faoliyat yuritayotgani, Toshkentdan Tbilisi va Batumiga to‘g‘ridan-to‘g‘ri aviaqatnovlar yo‘lga qo‘yilgani mustahkam poydevor mavjudligidan dalolat beradi.
Endigi bosqichda farmatsevtika, kimyo sanoati, elektrotexnika, raqamli texnologiyalar va turizm sohalarida imzolangan 2027-yilgacha mo‘ljallangan Kooperatsiya dasturi ikki mamlakat taraqqiyotiga yangi sur’at baxsh etadi. Ishbilarmonlarning loyihalarini qo‘llab-quvvatlash uchun qo‘shma Investitsiya jamg‘armasining tashkil etilishi va O‘zbekistonning Gruziyada o‘z elchixonasini ta’sis etishi esa aloqalarning institutsional darajada mustahkamlanganini ko‘rsatadi.
Mazkur tashrifning eng muhim geoiqtisodiy jihati – Markaziy Osiyo va Janubiy Kavkaz mintaqalarini bog‘lovchi tranzit-transport yo‘laklarini rivojlantirish bilan bog‘liq. O‘zbekiston o‘z mahsulotlarini jahon bozoriga chiqarish uchun diversifikatsiyalangan transport yo‘nalishlariga ehtiyoj sezadi. Shu ma’noda, Gruziyaning Poti va Batumi portlari infratuzilmasidan faol foydalanish, u yerda o‘zbek mahsulotlari uchun logistika xabi va sanoat zonasini tashkil etish rejasi mintaqalararo savdoni butunlay o‘zgartiradi.
Davlatimiz rahbari tomonidan ilgari surilgan, yangi ishga tushgan “Boku – Tbilisi – Kars” temir yo‘lini qurilayotgan “Xitoy – Qirg‘iziston – O‘zbekiston” magistrali bilan integratsiya qilish tashabbusi Buyuk ipak yo‘lini zamonaviy formatda qayta tiklashga xizmat qiladi. Bu nafaqat O‘zbekiston yoki Gruziya, balki butun Markaziy Osiyo va Kavkaz mintaqalarini global ta’minot zanjirining ajralmas va eng xavfsiz qismiga aylantiradi.
Shuningdek, O‘zbekiston uchun ushbu tashrif Prezident Shavkat Mirziyoyev olib borayotgan faol va ochiq tashqi siyosatning mantiqiy davomidir. Mamlakatimiz Yevropa va Yaqin Sharq darvozasi hisoblangan Kavkaz mintaqasida o‘zining ishonchli va strategik hamkoriga ega bo‘ldi. Siyosiy va iqtisodiy manfaatlardan tashqari, Tbilisi markazidagi bog‘lardan biriga suyukli shoirimiz Alisher Navoiy nomining berilishi o‘zbek xalqi va madaniyatiga bo‘lgan cheksiz hurmat ramzidir.
Xulosa qilib aytganda, Prezidentimizning Gruziyaga davlat tashrifi ikki tomonlama munosabatlarda yangi asrni boshlab berdi. Bu hamkorlik O‘zbekiston milliy manfaatlarini ta’minlash, ikki do‘st xalq farovonligini yuksaltirish va keng mintaqada barqaror iqtisodiy taraqqiyotni kafolatlashga xizmat qiladi.
Muharram DADAXO‘JAEVA,
“Adolat” SDP Toshkent shahar kengashi raisi.
O‘zA
