Бутунжаҳон таэквондо ассоциацияси 3 декабрь куни янгиланган рейтингни эълон қилди.
Эътиборлиси, ушбу рейтинг якунига кўра кучли бешликка кирган спортчиларга Париж Олимпиадаси учун лицензиялар тақдим этилади.
Ушбу рейтингга кўра, ҳамюртларимиз Улуғбек Рашитов (68) ва Светлана Осипова (+67) "Париж-2024" йўлланмаларини қўлга киритди.
Улуғбек Рашитов ўз вазнида 1-ўринни эгаллаб турган бўлса, Светлана Осипова 7-ўриндан жой олган. Ушбу вазнда икки нафар Туркия, икки нафар Британия вакили бўлгани учун Осипова бешинчи лицензия соҳибасига айланди.
Маълумот учун, Олимпиадада битта вазн тоифасида бир мамлакатдан бир нафар спортчи иштирок этиши мумкинлиги белгиланган.
Қайд этиш лозим, ўзбекистонлик спортчиларда ҳали якуний “Катта дубулға” мусобақаси, шунингдек, 2024 йилги Осиё йўлланмаси турнирларида Париж Олимпиадаси учун лицензиялар қўлга киритиш имконияти мавжуд.
Эслатиб ўтамиз, мамлакатимиз спортчиларининг бугунгача Париж Олимпиадаси учун йўлланмалари сони 17 тани ташкил этмоқда.
Т. Рўзиев, ЎзА