Табиат қўйнидаги қушлар парвози
Табиатнинг бетакрор манзаралари инсон қалбига завқ бағишлаб, атроф-муҳит гўзаллигини янада теранроқ ҳис этишга ундайди. Айниқса, сув ҳавзалари бўйида тўпланган қушлар, уларнинг осмондаги эркин парвози ва сув юзидаги жозибали товланишлар ўзига хос манзарани намоён этади.
Навоий вилоятидаги сув ҳавзалари атрофида учрайдиган қушлар табиатнинг ажралмас қисми бўлиб, ҳудуднинг биологик хилма-хиллигини бойитишга хизмат қилади. Сув бўйида озуқа излаётган, сув юзида сузиб юрган ёки осмонда гала-гала бўлиб парвоз қилаётган қанотлилар табиат ҳаётининг жўшқинлигини акс эттиради.
Айниқса, тонгги қуёш нурлари сув юзини ёритиб, қушларнинг ҳаракати билан уйғунлашган дамларда манзара янада мафтункор тус олади. Қанот қоқиб парвозга кўтарилган қушлар, сув бўйидаги сокинлик ва табиий муҳитнинг ўзаро уйғунлиги кишига беқиёс эстетик завқ бағишлайди.
[gallery-31988]
Бундай манзаралар нафақат табиатнинг гўзаллигини намоён этади, балки уни асраш, сув ҳавзалари ва қушлар яшаш муҳитини муҳофаза қилиш зарурлигини ҳам эслатади. Зеро, табиий бойликларни келажак авлодга бус-бутун етказиш, атроф-муҳит мусаффолигини сақлаш ва биологик хилма-хилликни муҳофаза қилиш барчамизнинг муҳим вазифамиздир.
Сирож АСЛОНОВ (сурат), ЎзА
