Sirdaryo delegatsiyasi Xitoyda
Sirdaryo viloyati hokimi Erkinjon Turdimov boshchiligidagi delegatsiya Xitoyning Tyanszin (Tianjian) shahrida amaliy tashrif bilan bo‘lib turibdi. Bu tashrif quruq protokol uchrashuvlari emas, balki to‘g‘ridan-to‘g‘ri ish bilan boshlanganligi bilan e’tiborga molik.
Delegatsiyaning dastlabki kuni Xitoy–SHHT Yashil sanoat hamkorlik markazi, raqamli iqtisodiyot hamkorlik platformasi, Phytium Information Technology kompaniyasi, Xalqaro tibbiy asbob-uskunalar savdo platformasi markazi va qator yirik tashkilotlarda bo‘lib, zamonaviy texnologiyalar va innovatsion yechimlar bilan tanishdi.
Shuningdek, delegatsiya turli sohalarda amaliy muloqotlarni olib bordi. Ular avvalo raqamli iqtisodiyot va ma’lumotlar boshqaruvi sohasidagi yangiliklar bilan tanishdi, bu esa Sirdaryoda elektron ma’lumotlar tizimini takomillashtirish va raqamli transformatsiyani rivojlantirish imkoniyatini berdi. Keyingi qadamda yuqori texnologiyali industrial hududlarda amaliyotlarni ko‘zdan kechirish va zamonaviy ishlab chiqarish jarayonlari bilan yaqindan tanishish bo‘ldi.
Shu bilan birga, delegatsiya axborot texnologiyalari va kiberxavfsizlik masalalariga alohida e’tibor qaratdi, zamonaviy xavfsizlik yechimlari va IT infratuzilmalarini o‘rgandi. Innovatsion ishlab chiqarish jarayonlari esa delegatsiya ishtirokchilari uchun yangi texnologik yechimlarni amaliy tarzda ko‘rish imkonini yaratdi.
Safarning yana bir muhim yo‘nalishi — elektron xarid va tibbiyot infratuzilmasini rivojlantirish masalalari bo‘ldi. Bu jarayonda delegatsiya tibbiyot sohasida raqamli platforma va elektron savdo tizimlari bilan tanishdi, ularni Sirdaryoda samarali qo‘llash imkoniyatlari muhokama qilindi.
Qo‘shimcha ravishda delegatsiya “360 Technology Group”, “Tianjin Haitai Internet Technology” kabi yirik kompaniya vakillari bilan ham uchrashuvlar o‘tkazdi. Ushbu uchrashuvlarda hamkorlikning amaliy yo‘nalishlari, texnologiyalar va investitsiya imkoniyatlari muhokama qilindi.
Eng muhimi, bu tashrif faqat kuzatish uchun emas, balki Sirdaryo viloyati uchun amaliy hamkorlikni boshlash va zamonaviy boshqaruv hamda investitsiya yechimlarini jalb qilishga qaratilgan qadam sifatida baholanmoqda. Yangi texnologiyalar va innovatsion yechimlar Sirdaryoda iqtisodiyotni rivojlantirish, sanoatni modernizatsiya qilish va raqamli transformatsiya jarayonlarini jadallashtirishga xizmat qiladi.
G‘ulom Primov, O‘zA muxbiri
