Президент олимпиадаси: финал босқичига тайёргарлик ишлари муҳокама қилинди
Спорт вазирлигида “Президент Олимпиадаси” спорт мусобақаларининг республика финал босқичига кўрилаётган тайёргарлик ишлари ҳамда ҳудудий жамоалар учун ишлаб чиқилган спорт экипировкалари намуналари кўриб чиқилди.
Йиғилиш давомида мусобақанинг финал босқичини юқори савияда ташкил этиш, иштирокчилар учун зарур шарт-шароитларни яратиш, спорт иншоотларини тайёрлаш ҳамда ташкилий масалалар юзасидан батафсил маълумот берилди.
Шунингдек, ҳудудий жамоалар учун мўлжалланган спорт экипировкалари намуналарининг тақдимоти ўтказилиб, уларнинг сифати ва дизайни муҳокама қилинди.
Муҳокамалар якунида масъулларга тайёргарлик жараёнларини жадаллаштириш, барча ташкилий ишларни белгиланган муддатларда якунлаш, мусобақаларни бошқариб борадиган ҳакамлар, техник мутахассисларнинг иш тизими ҳамда мусобақаларни юқори савияда ўтказишни таъминлаш бўйича масъулларга тегишли топшириқлар берилди.
Айтиш лозимки, бу йилги “Президент олимпиадаси” мусобақалари 13-14 ёшли спортчилар ўртасида 21 та олимпия ва 5 та паралимпия спорт тури бўйича 10-18 ёшли пара спортчилар ўртасида ташкил этилиши белгиланган.
Янги Ўзбекистоннинг профессионал спортдаги янги ғалабаларини таъминлашга қаратилган мазкур спорт ўйинларининг биринчи ва иккинчи босқич мусобақалари жойларда уюшқоқлик билан ташкил этилгани эътироф этилди.
Жорий йилнинг март-апрель ойларида республикамиздаги мавжуд 208 та туман ва шаҳарларда ўтган илк босқич баҳсларида 330 мингга яқин ёш спортчиларнинг иштироки таъминланиб, совринли ўринларни эгаллаган 30 минг нафардан зиёд оловқалб ёшлар май-июнь ойларидаги 2-босқичда ўз маҳоратини намойиш этди.
Йиғилиш якунида “Президент олимпиадаси” мусобақаларининг финал босқичини ҳар жиҳатдан уюшқоқлик билан ташкил этишда дахлдор ташкилотлар билан ҳамжиҳатликда ишлаш бўйича аниқ режалар ишлаб чиқиш лозимлиги таъкидланди.
Т.Рўзиев, ЎзА
