Ўзбекистонга қанча одам доимий яшаш учун кўчиб келган?

Ўзбекистоннинг халқаро майдондаги ўрни ва аҳамияти ортиб бораётгани статистик рақамларда ҳам ўз аксини топмоқда. Миллий статистика қўмитасининг сўнгги ҳисоботига кўра, 2025 йил давомида 1 минг 159 нафар хориж фуқароси мамлакатимизни доимий яшаш манзили сифатида танлаган. Бу кўрсаткич юртимиздаги ижтимоий-иқтисодий барқарорлик ва минтақавий интеграция жараёнларининг амалий натижасидир.

Миграция оқимларининг географик таҳлили шуни кўрсатадики, Ўзбекистонга кўчиб келаётганларнинг асосий қисми қўшни ва яқин ҳамкор давлатлар ҳиссасига тўғри келмоқда. Рўйхатнинг юқори поғонасини Россия Федерацияси эгаллаб турибди — жами кўчиб келганларнинг салкам 40 фоизи айнан шу давлат фуқаролари. Шунингдек, кучли учликдан Қозоғистон (20,3 %) ва Тожикистон (10,3 %) жой олган. Марказий Осиёнинг бошқа республикалари — Қирғизистон ва Туркманистондан келганлар ҳам сезиларли улушга эга. Қолган 22 фоиздан ортиқ кўрсаткич эса дунёнинг бошқа турли нуқталаридан келган меҳмонлар ҳиссасига тўғри келади.

Мамлакат ичидаги тақсимотга назар ташласак, Тошкент шаҳри ҳамон юқори ўринда қолмоқда. Янги келганларнинг қарийб 60 фоизи (698 нафар) айнан пойтахтни танлаган бўлса, Тошкент вилояти 275 нафар резиденти билан иккинчи ўринда қайд этилди. Шунингдек, Қорақалпоғистон Республикаси (101 нафар) ҳам мигрантлар эътиборидаги муҳим манзиллардан бирига айланган.  

Бошқа вилоятларда кўрсаткичлар нисбатан пастроқ бўлса-да, республиканинг деярли барча ҳудудларида янги фуқаролар рўйхатга олинган. Бу ҳолат Ўзбекистоннинг нафақат йирик марказлари, балки чекка ҳудудлари ҳам хорижликлар учун яшаш ва фаолият юритиш учун қулай муҳитга эга эканини тасдиқлайди.

Ҳамроз Баёнов,

ЎзА