Она тили бор экан, миллат яшайди!
21 октябрь – Ўзбек тили байрами куни муносабати билан Абдулла Қодирий номидаги ижод мактабида ўқувчилар ўртасида «Заковат» интеллектуал ўйини ташкил этилди.
Мазкур интеллектуал беллашув ўқувчиларнинг билим ва тафаккурини синовдан ўтказиш, мантиқий фикрлаш қобилиятини ривожлантириш, дунёқарашини кенгайтириш, жамоавий ҳамкорлик кўникмаларини мустаҳкамлаш ҳамда она тилимизга бўлган меҳр ва эҳтиромни янада юксалтиришга хизмат қилди.
Тадбир давомида иштирокчилар ўз билимлари, топқирликлари ва зукколикларини намоён этиб, берилган саволларга мантиқий ёндашув асосида жавоб топишга интилдилар. Қизғин баҳс-мунозаралар, ўзаро фикр алмашиш ва жамоавий ҳамжиҳатлик беллашувга кўтаринки руҳ бағишлади. Ҳар бир савол ўқувчиларни мустақил фикрлашга, изланишга ва ўз билимларини янада бойитишга ундади.
Она тили миллатнинг руҳи, миллий ўзлигимиз кўзгуси, маънавий бирлигимиз асоси ва халқимизнинг бебаҳо бойлигидир. Унда аждодларимизнинг кўп асрлик тарихи, донолиги, орзу-интилишлари, маданияти ва бой маънавий мероси мужассам. Шу боис она тилимизни асраб-авайлаш, унинг софлигини сақлаш, нуфузини юксалтириш ва келажак авлодларга муносиб етказиш ҳар биримизнинг муқаддас бурчимиздир.
Бундай маърифий тадбирлар ёш авлод қалбида она тилига муҳаббат, миллий қадриятларга ҳурмат ва Ватанга садоқат туйғуларини шакллантиришда муҳим аҳамият касб этади. Шунингдек, ўқувчиларни китоб мутолаасига, илм-маърифатга, мустақил изланишга ва ўз устида мунтазам ишлашга ундаб, уларнинг интеллектуал салоҳиятини юксалтиришга замин яратади.
«Заковат» майдонидаги беллашув иштирокчиларнинг нафақат билимларини, балки тезкор фикрлаш, тўғри қарор қабул қилиш, жамоа билан ҳамжиҳатликда ишлаш ва мақсад сари интилиш каби муҳим фазилатларини ҳам намоён этди. Ўқувчилар ҳар бир жавоб замирида изланиш, билим ва теран тафаккур мужассам эканини яна бир бор исботладилар.
Она тилимиз миллий ғуруримиз, маънавий таянчимиз ва келажак авлодларга қолдирадиган энг бебаҳо меросимиздир. Уни севиш Ватанни севиш, ардоқлаш эса миллий ўзлигимиз ва қадриятларимизга садоқат белгисидир.
Н.Усмонова, ЎзА
