Олий суд пленуми: кун тартибида янги судьялар қасамёди ва янги қонун лойиҳалари
Олий суд пленумининг навбатдаги мажлисида айрим жиноят ва фуқаролик ишлари бўйича шаҳар, туман ва туманлараро ҳамда туманлараро иқтисодий ва маъмурий судларга илк бор судьялик лавозимига тайинланган судьяларнинг қасамёд қабул қилиш маросими ўтказилди.
Мажлисда Судьялар олий кенгашининг қарорларига мувофиқ судьялик лавозимида бўлишнинг биринчи беш йиллик муддатига тайинланган 35 нафар судьянинг қасамёди эшитилди.
Қасамёд қабул қилган янги судьяларга судьялик гувоҳномалари билан бирга "Судьялар одоби кодекси" топширилди.
Мажлисда “Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида” ҳамда “Ўзбекистон Республикаси Иқтисодий процессуал кодексига ўзгартиришлар киритиш тўғрисида”ги қонун лойиҳаларини маъқуллаш ва уларни белгиланган тартибда парламентга киритиш ҳақидаги қарорлар қабул қилинди.
“Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида” қонун лойиҳаси билан Жиноят-процессуал кодекси ҳамда “Адвокатура тўғрисида”ги қонунга ўзгартиш ва қўшимчалар киритиш назарда тутилиб, уларга мувофиқ жиноят ишини судларга айблов хулосаси (айблов далолатномаси) ва ҳимоя фикри билан бирга тақдим этиш ҳамда уни тақдим этиш тартиби, шунингдек ушбу ҳужжатнинг мазмунига доир талаблар белгиланмоқда.
Таклиф этилаётган тартибга кўра, дастлабки тергов ёки суриштирув тамомлангандан сўнг, ҳимоячи жиноят иши материаллари билан танишиб бўлгач, ҳимоя фикрини бевосита жиноят иши материаллари иш юритувида бўлган прокурорга ёки ишни судда кўриб чиқиш бошлангунга қадар судга тақдим этиш ҳуқуқига эга бўлади.
“Ўзбекистон Республикаси Иқтисодий процессуал кодексига ўзгартиришлар киритиш тўғрисида”ги қонун лойиҳасида Иқтисодий процессуал кодексига қўшимча киритилиб, қонуний кучда бўлган ва юқори инстанция судида низолашилаётган суд ҳужжатининг ижросини юқори инстанция суди томонидан тўхтатиб туриш учун ишда иштирок этувчи шахс ўз илтимосномасида суд ҳужжатининг ижросини тўхтатиб туриш бўйича чораларни кўрмаслик унинг қайтарма ижросини қийинлаштириши ёки бажариб бўлмайдиган қилиб қўйиши мумкинлигини асослаб бериши лозимлиги белгиланмоқда.
Н.Абдураимова,
ЎзА
