Мемлекет басшысы кино саласына заманауи басқару әдістерін енгізуді тапсырды
Президент Шавкат Мирзиёев кино саласына заманауи басқару әдістерін енгізу және «O‘zbekfilm» ұлттық кино брендін құру жөніндегі тұсаусеремен танысты.
Кино өнері қоғамның әлеуметтік-рухани өмірінде маңызды орын алады. Ол елдің тарихын, ұлттық құндылықтары мен заманауи даму үдерісін кең жұртшылыққа танытудың тиімді құралы саналады.
Кейінгі жылдары бұл салаға көңіл бөлу түбегейлі күшейді. Президенттің 10 жарлығы мен қаулысы қабылданып, соңғы он жылда кино өндірісін бюджеттен қолдау көлемі бірнеше есе артты.
Саладағы мемлекеттік монополия жойылып, жеке киностудиялардың жұмысы жолға қойылды. Тарихи тұлғалар мен ұлттық бірегейлікті тануға арналған туындылар түсіріліп, заманауи кинопавильондар салынды. Шет мемлекеттермен бірлескен ірі жобалар жүзеге асырылуда.
Мемлекет басшысы атқарылып жатқан шараларға қарамастан, салада бірқатар кемшілік сақталып отырғанын атап өтті. Атап айтқанда, ұлы өзбек режиссерлері негізін қалаған терең психологиялық әрі философиялық өзбек кино мектебінің әлсіреп, үстірт сюжетке құрылған фильмдердің көбейгені, сапалы сценарийлердің жетіспейтіні, сондай-ақ операторлық өнер, дыбыс режиссурасы мен монтаж салаларында ұрпақтар сабақтастығының үзіле бастағаны айтылды.
Зерттеу нәтижелері қазіргі уақытта өндіріске жоспарланған 181 жобада тақырыптар мен тарихи кезеңдердің қайталанатынын, шығармашылық мамандардың бір мезгілде бірнеше жобаға қатысатынын, сондай-ақ кейбір студиялар мен шығармашылық топтардың тәжірибесі жеткіліксіз екенін көрсетті.
Агенттік қызметінің тиімділігі негізінен түсіріліп жатқан фильмдердің танымалдығы мен көрерменнің бағасына емес, бекітілген жоспардың орындалуына қарай бағаланатыны атап өтілді. Сонымен қатар фильмдерді маркетингтеу, тарату және халықаралық нарықта сату жүйесі жолға қойылмаған.
Таныстырылымда кино саласына заманауи басқару әдістерін енгізу және «O‘zbekfilm» ұлттық кино брендін құру мақсатында бірқатар бастама ұсынылды. Атап айтқанда, Кинематография агенттігін, оның жүйесіндегі 19 ұйымды және Кинематография қорын таратып, олардың өкілеттіктерін Мәдениет министрлігіне беру, босайтын ғимараттарды аукцион арқылы сату ұсынылды.
Мәдениет министрлігінің құрылтайшылығымен «O‘zbekfilm» ұлттық кинокомпаниясын құрып, оны саладағы негізгі оператор ретінде белгілеу көзделіп отыр. Кино өнімдерін өндірудегі мемлекеттік тапсырыс жүйесі жойылып, жобалар компанияға бөлінетін бюджеттік субсидиялар есебінен қаржыландырылады.
Сондай-ақ Dolby Atmos технологиясына негізделген дыбыс студиясымен жабдықталған заманауи дубляж және дыбыстау орталығын құру, ұлттық онлайн-кино платформасын әзірлеп, фильмдерден табыс табу мүмкіндігін қалыптастыру жоспарлануда.
Мемлекет басшысы ұсыныстарды мақұлдап, кино саласына заманауи басқару әдістерін енгізуді жеделдету, шығармашылық еркіндікті қамтамасыз ету, сапалы сценарийлер мен өміршең сюжеттерге негізделген фильмдер түсіруді кеңейту және өзбек кино мектебінің халықаралық деңгейдегі беделін қалпына келтіру жөнінде жауапты тұлғаларға тапсырмалар берді.
