Макрон Путинни Украина бўйича музокарага чорламоқчи (+видео)
Кремль матбуот котиби Дмитрий Песковнинг маълум қилишича, Франция президенти Эммануэль Макрон Россия президенти билан алоқаларни қайта тиклаш тарафдори эканини билдирган. У Украинадаги урушни тугатиш бўйича музокаралар қайта бошланса, европаликлар ҳамда украинлар манфаатига хизмат қилишини таъкидлаган.
Песковнинг қўшимча қилишича, икки давлат етакчилари ўртасидаги эҳтимолий алоқалар “насиҳат ўқиш эмас, балки бир-бирининг қарашларини тушунишга уриниш” бўлиши керак.
“Путин ҳар доим ўз нуқтаи назарини суҳбатдошларига батафсил тушунтиришга, самимий ва изчил равишда изоҳлаб беришга тайёр”, - деган Россия президентининг матбуот котиби.
Июль ойида Макрон ва Путин сўнгги уч йил ичида илк бор телефон орқали суҳбат ўтказишган эди. Улар ўшанда Украинадаги урушни, Теҳрон ва Тель-Авив ўртасидаги можаронинг кескинлашувини, шунингдек, АҚШнинг Эрондаги ядровий объектларга берган зарбаларини муҳокама қилишган. Томонлар Яқин Шарқ бўйича позицияларни мувофиқлаштириш учун келишиб олишган эди.
Мутахассисларнинг таъкидлашича, Макрон Россия етакчисини мулоқотга чақиришидан мақсад ўзини АҚШдан мустақил равишда Европа номидан гаплаша оладиган етакчи сифатида кўрсатишдир. Бу чорлов Путинга ҳам халқаро миқёсда яккаланмаганлигини намоён қилиш ёки биз музокаралардан қочмаяпмиз, деган позицияни кўрсатиш учун ҳам зарур. Аммо, бу ҳали тинчлик музокаралари қайтадан бошланди, дегани эмас, албатта. Бир сўз билан айтганда, дипломатик эшиклар очиқ қолганини ҳам кўрсатади.
<iframe width="650" height="420" src="https://www.youtube.com/embed/_2bUaxyJ_k0" title="Makron Putinni Ukraina bo‘yicha muzokaraga chorlamoqchi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Улуғбек Тўхтаев, ЎзА
