Legionerlarimiz: bugun Husanov Angliyada, Masharipov va Ashurmatov Eronda maydonga tushishi mumkin
Asosiy e’tibor Abduqodir Husanov faoliyat olib borayotgan “Manchester Siti”ga qaratiladi.
Bugun, 28-avgust kuni xorij klublarida faoliyat olib borayotgan bir qator o‘zbekistonlik futbolchilar navbatdagi uchrashuvlarini o‘tkazadi. Kun dasturidan Angliya Premyer-ligasi hamda Eron chempionatidagi qiziqarli bahslar o‘rin olgan.
Asosiy e’tibor Abduqodir Husanov faoliyat olib borayotgan “Manchester Siti”ga qaratiladi. “Shaharliklar” Premyer-liganing navbatdagi turida safarda “Kristal Pelas” mehmoni bo‘ladi.
Uchrashuv 28-avgust kuni London vaqti bilan 20:00 da boshlanadi. Toshkent vaqti bilan esa bahs 29-avgustga o‘tar kechasi soat 00:00 ga to‘g‘ri keladi.
“Manchester Siti” yangi mavsumdagi dastlabki uy uchrashuvida “Bornmut”ni 2:1 hisobida mag‘lub etdi. Endi jamoa mavsumdagi ilk safar uchrashuvini “Selxerst Park”da o‘tkazadi. Abduqodir Husanovning ushbu bahsda ishtirok etishi o‘zbekistonlik muxlislar uchun alohida qiziqish uyg‘otadi.
Eronda esa birdaniga uch nafar legionerimizning jamoalari maydonga tushadi.
Odiljon Hamrobekov to‘p tepayotgan “Traktor” safarda “Chadormalu” bilan uchrashadi. Bahs Toshkent vaqti bilan 20:30 da boshlanadi.
“Traktor” mavsumni juda muvaffaqiyatli boshladi. Tabriz klubi dastlab “Paykan”ni 2:0, keyin safarda “Sepahan”ni 2:0 hisobida mag‘lub etdi. So‘nggi turda esa “Persepolis” ustidan 1:0 hisobida g‘alaba qozondi. Uch uchrashuvdan 9 ochko jamg‘argan “Traktor” peshqadamlar qatorida bormoqda.
Kunning o‘zbekistonlik muxlislar uchun yana bir muhim uchrashuvi “Fulad” va Tehronning “Istiqlol” klublari o‘rtasida bo‘ladi.
“Istiqlol” safida ikki nafar o‘zbekistonlik — Jaloliddin Masharipov va Rustam Ashurmatov faoliyat olib bormoqda. Masharipovning “Istiqlol” bilan shartnomasi 2027-yil yozigacha amal qiladi, Ashurmatov esa Tehron klubi himoya chizig‘ining vakillaridan biri hisoblanadi.
“Istiqlol”ning mavsum starti ham ajoyib kechmoqda. Jamoa dastlab “Mes Shahr-e Babak”ni 4:0, keyin “Nassaji”ni 1:0, so‘ng “Sepahan”ni 2:0 hisobida mag‘lub etdi. Shu tariqa Tehron klubi uchta uchrashuvdan maksimal 9 ochko jamg‘ardi.
“Fulad” — “Istiqlol” uchrashuvi Toshkent vaqti bilan 22:30 da boshlanadi.
Bugungi legionerlarimiz ishtirokidagi asosiy uchrashuvlar:
20:30. “Chadormalu” — “Traktor”
Odiljon Hamrobekov
22:30. “Fulad” — “Istiqlol”
Jaloliddin Masharipov, Rustam Ashurmatov
00:00. “Kristal Pelas” — “Manchester Siti”
Abduqodir Husanov
