Kogonlik tadbirkor ayollar
Buxoro viloyati Kogon tumanida so‘nggi yillarda tadbirkorlik, xususan, ayollar bandligini ta’minlash va ularning iqtisodiy faolligini oshirish borasida e’tiborga molik ishlar amalga oshirilmoqda. Hududdagi faol va tashabbuskor ayollar o‘z mehnati va izlanishlari bilan nafaqat o‘z oilasini, balki butun mahalla iqtisodini ham qo‘llab-quvvatlab kelmoqda. Ular orasida o‘z ishini boshlab, uni muvaffaqiyatli darajada rivojlantirgan tadbirkor ayollar boshqalarga namuna bo‘lmoqda.
Jumladan, Kogon tumanidagi “Saodat atelesi” rahbari Saodat Achilova 2013-yildan buyon tikuvchilik yo‘nalishida samarali faoliyat yuritib kelmoqda. U o‘z ish faoliyatini dastlab 7 ta tikuv mashinasi va 2 nafar xodima bilan boshlagan bo‘lsa, bugungi kunda 6 nafar xotin-qizni doimiy ish bilan ta’minlab, 100 dan ziyod shogirdining tadbirkorlik sari qadam qo‘yishiga ko‘maklashgan.
–Har bir erishgan natijam mehnatim va sabrim samarasidir, –deydi Saodat Achilova. –Ayollarning o‘z ishini boshlashi va mustaqil daromad topishi men uchun eng katta yutuq hisoblanadi. Men shogirdlarimni ham o‘z kasbini sevishga, doim izlanishda bo‘lishga chorlayman.
Yana bir faol tadbirkor Nasiba Boboyeva ham tikuvchilik sohasida o‘z o‘rniga ega. U 2025-yilda tijorat banklari tomonidan ajratilgan 16,5 million so‘mlik imtiyozli kredit hisobiga o‘z ishini kengaytirishga muvaffaq bo‘ldi. Bu imkoniyat unga yangi uskunalar xarid qilish va ish hajmini oshirish imkonini berdi.
–Davlat tomonidan yaratilayotgan imkoniyatlar tadbirkor ayollar uchun katta qo‘llab-quvvatlovdir, –deydi Nasiba Boboyeva. –Olingan kredit orqali men ishimni kengaytirdim va yana ikki nafar ayolni ish bilan ta’minlashga erishdim. Bu esa men uchun katta yutuq va mas’uliyatdir.
Shuningdek, Madina Qodirova shirinlik va pishiriq mahsulotlarini tayyorlash yo‘nalishida faoliyat yuritib kelmoqda. U kichik sexda 27 turdagi shirinliklar, non va non mahsulotlarini tayyorlab, mahalliy bozorni sifatli mahsulotlar bilan ta’minlab kelmoqda. Uning 14 nafar xotin-qizni ish bilan ta’minlashi ham e’tiborga molik.
–Men uchun eng katta yutuq bu boshqalarga ish o‘rni yaratish va sifatli mahsulot tayyorlashdir, –deydi tadbirkor Madina Qodirova. –Har bir mehnatim ortida odamlarning qoniqishi turgani meni yanada ruhlantiradi.
Kogon tumanidagi bu kabi tadbirkor ayollar bilan suhbat chog‘ida ular o‘z faoliyatlarida uchrayotgan qiyinchiliklar, davlat tomonidan yaratilayotgan imkoniyatlar va kelgusidagi rejalari haqida so‘zlab berishdi. Ular uchun asosiy omil — mehnat, sabr va doimiy izlanish ekanligi alohida ta’kidlandi. Shu bilan birga, imtiyozli kreditlar, tadbirkorlikka oid dasturlar va mahalliy hokimiyatning qo‘llab-quvvatlashi ularning ishini yanada kengaytirishga xizmat qilmoqda.
Xulosa qilib aytganda, Kogon tumanida ayollar tadbirkorligini rivojlantirish borasida amalga oshirilayotgan ishlar samara bermoqda. Saodat Achilova, Nasiba Boboyeva va Madina Qodirova kabi fidoyi ayollar o‘z faoliyatlari orqali nafaqat iqtisodiy barqarorlikka hissa qo‘shmoqda, balki boshqa ayollar uchun ham namuna bo‘lib xizmat qilmoqda.
Zarif Komilov, O‘zA muxbiri
