Жиззахда яшил инқилоб: Ғаллаоролнинг интенсив боғлари
Ўзбекистон заминида кечаётган янгиланишлар нафақат шаҳарлар қиёфасида, балки чекка ҳудудлардаги адирларнинг боғ-роғларга айланаётганида ҳам яққол намоён бўлмоқда.
Жиззах вилоятида қишлоқ хўжалигини модернизация қилиш, экспортбоп маҳсулотлар етиштириш ва экологик барқарорликни таъминлашга қаратилган изчил ислоҳотлар замирида инсон қадрини улуғлаш ва халқимиз фаровонлигини оширишдек эзгу мақсад мужассам.
Давлатимиз раҳбари Шавкат Мирзиёев таъкидлаганидек: “Биз қишлоқ хўжалигида қўшимча қиймат занжирини яратишимиз, ерга бўлган муносабатни тубдан ўзгартиришимиз керак. Аграр соҳа иқтисодиётимизни ҳаракатга келтирувчи асосий драйверлардан бири бўлиши шарт”. Ана шу стратегик вазифа ижроси сифатида 2026 йил 9 апрель куни Ғаллаорол туманининг “Чаянли” маҳалласи ҳудудида “яшил иқтисодиёт” тамойилларини ўзида жамлаган йирик лойиҳа — 115 гектар майдонда интенсив гилос боғини барпо этишга старт берилди.
Бугунги кунда “Яшил макон” умуммиллий ҳаракати шунчаки кўчат экиш тадбири эмас, балки келажак авлод учун соғлом экологик муҳит ва мустаҳкам иқтисодий замин яратиш кафолатига айланди. Ғаллаорол тумани ҳокими Жалолитдин Оқбоев ва вилоят ҳокими ўринбосари Зафар Рўзиев иштирокида бошланган кўчат экиш жараёнларида нафақат мутахассислар, балки нуронийлар ва жамоатчилик вакилларининг ҳам фаол қатнашгани халқимизнинг бунёдкорлик руҳидан далолат беради.
[gallery-28665]
“BMB Holding” таркибидаги “BMB Gardens” корхонаси томонидан амалга оширилаётган ушбу лойиҳа доирасида аввал сув таъминоти оғир бўлган қаровсиз ерлар ўзлаштирилиб, замонавий агротехнологиялар асосида жонлантирилмоқда. Нидерландия ва Польша давлатларидан келтирилган, In vitro усулида етиштирилган “Батирма” навли аччиқ гилос кўчатларининг 50 минг тупи эндиликда бу заминга янги ҳаёт бағишлайди. Умумий қиймати 350 миллиард сўм бўлган ушбу ташаббус нафақат йилига 1000 тонна экспортбоп маҳсулот беради, балки 850 нафарга яқин ватандошимиз учун доимий ва мавсумий иш ўрни яратади.
Қишлоқ хўжалиги бўйича фалсафа доктори Собир Эгамбердиевнинг эътироф этишича, бу каби интенсив боғлар илм билан амалиётнинг уйғунлашуви натижасидир. Ҳудудда барпо этилган замонавий инфратузилма — томчилатиб суғориш тизими, артезиан қудуқлари ва сув ҳавзалари сувдан оқилона фойдаланиш маданиятини юксалтиради.
Президентимиз илгари сурган: “Қишлоқ хўжалигида илм бўлмаса, натижа ҳам бўлмайди. Биз ердан фойдаланишнинг энг замонавий, тежамкор ва самарали усулларини қўллашимиз зарур” деган тамойил Ғаллаорол мисолида ўз тасдиғини топмоқда. Мазкур лойиҳа нафақат Жиззах вилоятининг, балки бутун мамлакатимизнинг экспорт салоҳиятини оширишга хизмат қиладиган истиқболли қадамдир.
Ғаллаорол адирларида қад ростлаётган янги боғлар мамлакатимизда кечаётган шиддатли ислоҳотларнинг амалдаги ифодасидир. Зеро, бугун экилган ҳар бир кўчат эртага нафақат табиатга кўрк, балки халқимиз дастурхонига қут-барака, миллий иқтисодиётимизга эса рақобатбардошлик олиб келади. Зеро, Президентимиз таъкидлаганидек: “Халқимиз бой бўлса, давлат ҳам бой ва қудратли бўлади”.
Жиззах заминидаги бу хайрли ишлар Ўзбекистоннинг “яшил тараққиёт” йўлидаги қатъий иродаси ва порлоқ келажаги рамзи бўлиб қолаверади.
А. Қаюмов, Ж. Ёрбеков ЎзА мухбирлари
