Жавоҳир Синдоров Ҳиндистон мусобақасида иккинчи марта беш карра жаҳон чемпионини мағлуб этди
Ҳиндистоннинг Бангалор шаҳрида шахмат бўйича жамоалар ўртасида давом этаётган “Tech Mahindra Global Chess League” турнирида ҳамюртимиз Жавоҳир Синдоров собиқ жаҳон чемпиони Вишванатан Анандни икки бор мағлубиятга учратди.
Турнирнинг илк куни ўтказилган биринчи давра мусобақасида Жавоҳир халқаро шахмат федерациясининг амалдаги вице-президенти Анандни оқ доналарда, кеча якунланган баҳсда эса қора доналарда таслим этди.
Мукофот жамғармаси 1 миллион АҚШ долларидан иборат турнирнинг ортда қолган кунида Синдоров етакчилигидаги “FYERS American Gambits” жамоаси франциялик Максим Ваше-Лаграв сардорлигидаги “CheQ Mumba Masters” билан баҳс олиб борди. Жавоҳирнинг ўзи биринчи доскада Лаграв билан муроса йўлини танлади. Шунингдек, Синдоровнинг жамоадоши Бибисара Ассаубаева ҳиндистонлик Ҳарика Дронавалли билан, Марк'Андрия Маурицци Бардия Данешвар билан дурангга эришди. Нихал Сарин Пранешни 3:0 ҳисобида енгди. Бироқ “FYERS American Gambits” жамоаси аъзоларидан Даниил Дубов ва Сара Хадем рақибларига 4:0 кўринишида имкониятни бой бериши натижасида Максим Ваше-Лаграв жамоаси 11:6 ҳисобида устунликка эга бўлди.
Беш карра жаҳон чемпиони Вишванатан Ананд сардорлигидаги “PBG Alaskan Knights” жамоаси билан ўйинда эса Синдоров жамоаси рақибларини 12:9 ҳисобида мағлубиятга учратди.
Ушбу натижалардан кейин “FYERS American Gambits” жамоаси 9 очко билан қўшимча кўрсаткичлар эвазига пешқадамликка эришди.
Магнус Карлсен етакчилигидаги “Alpine Apl Pipers”, Ананднинг “CheQ Mumba Masters” ва Ян Непомнящий етакчилигидаги “Ganges Grandmasters” жамоалари ҳам 9 очко билан Синдоров жамоасини таъқиб этмоқда.
Бугун, 9 сентябрь куни турнирнинг навбатдаги баҳсида “FYERS American Gambits” жамоаси “Triveni Continental Kings” жамоаси билан куч синашади. Ушбу қарама-қаршилик ўйинида жавоҳир Синдоров Алиреза Фирузджа билан рўбарў келади.
Айтиш лозим, ушбу мусобақанинг илк босқичида ушбу жамоалар ўртасидаги баҳсда Синдоров Фирузджа билан дурангга эришган бўлса-да, унинг жамоаси 14:5 ҳисобида устунликка эришганди.
Т.Рўзиев, ЎзА
