Ижро ҳужжатлари бўйича қарздорликларни соддалаштирилган тартибда ундириш кўлами кенгайтирилади
2026 йил 20 апрелда “Ижро ишини юритишнинг соддалаштирилган тартиби янада такомиллаштирилиши муносабати билан “Суд ҳужжатлари ва бошқа органлар ҳужжатларини ижро этиш тўғрисида”ги Ўзбекистон Республикаси қонунининг 43-1 ҳамда 43-2-моддаларига ўзгартишлар ва қўшимча киритиш ҳақида”ги қонун кучга кирди.
Қонун билан “Суд ҳужжатлари ва бошқа органлар ҳужжатларини ижро этиш тўғрисида”ги қонунга киритилган ўзгартиришлар ва қўшимчага кўра, ижро ишини юритишнинг соддалаштирилган янги тартиби белгиланди.
Эндиликда бу амалиёт почта ва (ёки) видеоконференцалоқа харажатлари, коммунал хизматлар тўлови юзасидан қарздорлик, кўп квартирали уйлар мулкдорларининг мажбурий бадаллари ёки тўловлари бўйича қарздорлик, БҲМнинг 5 бараваридан кўп бўлмаган миқдордаги суммани ундиришга нисбатан ҳам татбиқ этилиши белгиланди.
Қонунда давлат ижрочиси соддалаштирилган тартибда ижро этишда ундирувни қарздор жисмоний шахснинг банклардаги ҳисобварақларида турган пул маблағларига қаратиш, меҳнатга ҳақ тўлашнинг энг кам миқдоридан кўп бўлмаган миқдордаги суммани ундириш ҳақидаги ижро ҳужжатлари бўйича ундирувни қарздор жисмоний шахснинг иш ҳақига, стипендиясига, пенсиясига ва бошқа турлардаги даромадларига қаратиш каби мажбурий ижро этиш чораларини қўллаши белгиланган.
Бироқ, киритилган қўшимчаларга кўра, юқорида келтирилган мажбурий ижро этиш чоралари видеоконференцалоқа харажатлари, коммунал хизматлар тўлови юзасидан қарздорлик, кўп квартирали уйлар мулкдорларининг мажбурий бадаллари ёки тўловлари бўйича қарздорлик каби ижро ҳужжатларига нисбатан қўлланилмайди.
Н.Абдураимова, ЎзА
