Инсон унутилмайди, сўз эскирмайди...

ФОТОРЕПОРТАЖ

Вақт шиддат билан ўтади, авлодлар алмашади, аммо халқ хизматига бағшида этилган соф виждонли умр, эл дардини қалбдан ўтказиб ёзилган куйдирги сўз ва инсонлар юрагида муҳрланиб қолган эзгу хотиралар ҳеч қачон унутилмайди.

Матбуот — даврнинг кўзгуси, журналистика эса машаққатли ва шарафли касбдир. Бухоро матбуотининг фидойи намояндаси, ўз ҳаёти ва тақдирини миллий журналистикамиз равнақига бахшида этган устоз ижодкор Эркин Ёдгоров ана шундай ўчмас из қолдирган сиймолардан эди. Унинг қаламида нафақат давр нафаси, балки оддий одамларнинг қувончу ташвишлари, юрт тақдири ва келажакка бўлган ишончи акс этарди. Устознинг ҳар бир мақоласида ҳақиқатга садоқат, касбий масъулият ва Ватанга бўлган чексиз муҳаббат мужассам эди. Бугунги кунда ҳам устоз журналистнинг шарафли ҳаёт йўли, бой ижодий мероси ва юксак инсоний фазилатлари ҳамкасблари, шогирдлари ҳамда кенг жамоатчилик хотирасида ардоқли бир маёқдек яшаб келмоқда.

Эркин Ёдгоров 1951 йилда қадимий ва навқирон Бухоро заминининг файзли гўшаларидан бири — Шофиркон туманида таваллуд топган. Меҳнат ва билимга бўлган иштиёқ уни илм масканлари сари етаклади. 1973 йилда у Тошкент давлат университетининг (ҳозирги Ўзбекистон Миллий университети) журналистика факультетини муваффақиятли тамомлаб, катта ҳаёт ва ижод майдонига кириб келди. Меҳнат фаолиятини дастлаб Вобкент тумани газетасида оддий мухбир сифатида бошлаган ёш ижодкорнинг истеъдоди, тинимсиз изланувчанлиги ва меҳнатсеварлиги қисқа вақт ичида соҳа мутахассислари эътиборини тортди. Орадан уч йил ўтиб, унинг тақдири вилоятнинг бош нашри – “Бухоро ҳақиқати” газетаси билан чамбарчас боғланди.

Бу табаррук даргоҳда Эркин ака мухбирликдан бошлаб, махсус мухбир, масъул котиб, бўлим муҳаррири ва таржимон вазифаларигача бўлган машаққатли, аммо шарафли йўлни босиб ўтди. Ўзбек ва рус тилларида чоп этиладиган нашрларда бирдек фаол ва сермаҳсул қалам тебратиб, матбуотнинг энг мураккаб жанрларида ҳам катта ҳаётий ва касбий тажриба тўплади.

Эркин Ёдгоров ўз даврининг жонкуяр ва принципиал журналистларидан бири сифатида Бухоро вилояти ҳаётида кечган муҳим ижтимоий-иқтисодий жараёнлар, йирик бунёдкорлик ишлари ва халқ турмушидаги тарихий ўзгаришларни доимо воқеалар марказида туриб, холис ва ҳаққоний ёритиб борди. Унинг қаламига мансуб репортажлар, очерклар ва таҳлилий мақолалар нафақат воҳа, балки республика миқёсида ҳам кенг акс-садо берар ва эътироф этиларди. Юрт тараққиёти, инсон тақдири, ижтимоий адолат ва жамият ҳаётига дахлдор долзарб мавзулар ижодкор фаолиятининг бош мезонига айланган эди. Забардаст журналист сифатида у шаҳар ва туманларда амалга оширилаётган кенг кўламли ислоҳотларнинг моҳиятини оддий халқ тилида содда, лўнда ва таъсирчан тарзда етказиб берди. Бу билан у халқ ва давлат ўртасидаги мустаҳкам маънавий кўприк вазифасини шараф билан бажарди.

Эркин Ёдгоров кўп йиллар давомида мамлакатимизнинг бош ахборот маскани — Ўзбекистон Миллий ахборот агентлигининг (ЎзА) Бухоро вилояти бўйича шарҳловчиси, махсус мухбири сифатида ҳам самарали меҳнат қилди. Тезкорлик, аниқлик ва холислик талаб этиладиган бу масъулиятли жабҳада у вилоятнинг ижтимоий-сиёсий ҳаётини республика ва халқаро миқёсда кенг ёритишга улкан ҳисса қўшди. Шу билан бир қаторда, вилоят ва республика нашрларида етакчи вазифаларда ишлаш жараёнида юзлаб ёш ижодкорларга устозлик қилди, уларга касб сирларини, сўз масъулиятини ва матбуотга садоқатни ўргатди. Унинг бой ҳаётий мактаби ва ижодий услуби бугунги кунда ҳам кўплаб ёш журналистлар учун ҳақиқий маҳорат мактаби вазифасини ўтамоқда.

Устознинг кўп йиллик фидокорона меҳнатлари, жамият ҳаётидаги фаол иштироки ва миллий матбуотимизни ривожлантириш йўлидаги улкан хизматлари давлатимиз томонидан юксак баҳоланди. 2021 йилда Президентимиз фармонига мувофиқ, Эркин Ёдгоров юртимизнинг фахрли мукофотларидан бири — “Меҳнат шуҳрати” ордени билан тақдирланди.

"Яхшидан боғ қолади, демишлар. Шарафли ижодкордан эса эл қалбида яшайдиган соф сўз, содиқ шогирдлар ва ўчмас маънавий мерос қолади."

Бугун орамизда устоз Эркин Ёдгоров жисмонан йўқ бўлса-да, у қолдирган бой ва серқирра ижодий мерос, миллий матбуотимиз тараққиёти йўлидаги беқиёс хизматлари ва амалга оширган хайрли ишлари замондошлари ва воҳа аҳли томонидан чуқур ҳурмат-эҳтиром билан ёдга олинади. Устознинг ҳаёт йўли — касбга бўлган чексиз садоқатнинг, фидойилик ва ҳалолликнинг олий намунасидир. Унинг номи ва ёрқин сиймоси Бухоро матбуоти тарихида олтин ҳарфлар билан муҳрланиб қолган бўлса, ўзи асос солган ижод мактаби келажак авлод журналистлари учун йиллар ўтса-да, ўз қийматини йўқотмайдиган ҳаётий ва касбий йўлчи юлдуз бўлиб хизмат қилаверади.

Тоҳир ИСТАТОВ (сурат), ЎзА