Хорижий фуқаролар ҳуқуқлари ҳам давлат ҳимоясида
Бугун Янги Ўзбекистоннинг халқаро майдондаги нуфузи нафақат иқтисодий ислоҳотлар, балки инсон ҳуқуқ ва эркинликларини таъминлаш борасидаги қатъий қадамлари билан ҳам юксалиб бормоқда. Мамлакатимизда истиқомат қилаётган ҳар бир шахс, унинг миллати, дини ва фуқаролигидан қатъи назар, қонун ҳимоясидадир. Айниқса, инсон ҳаётидаги муҳим воқеаларни ҳуқуқий жиҳатдан мустаҳкамлаш, давлат хизматларини кўрсатишда тенглик ва очиқлик тамойилларига таяниш адлия органлари фаолиятининг бош мезонига айланди. Бу жараёнда бола ҳуқуқларини ҳимоя қилиш, уларнинг туғилишини ўз вақтида қайд этиш ва ҳуқуқий мақомини белгилаш келажак авлод олдидаги масъулиятимизнинг амалий ифодасидир.
Тошкент шаҳрининг замонавий қиёфаси ва меҳмондўст муҳити бугун кўплаб хорижий фуқароларнинг юртимизда яшаб, фаолият юритиши учун қулай имконият яратмоқда. Бунинг бир мисоли сифатида пойтахтимизда истиқомат қилаётган Германия Федератив Республикаси фуқаролари Ригерлар оиласини келтириш мумкин. Яқинда мазкур оилада дунёга келган Александра Елизабет Ригернинг туғилганлик ҳолати Чилонзор туманидаги 2-сон ФҲДЁ бўлими томонидан қонунчиликда белгиланган тартибда давлат рўйхатидан ўтказилди.
Чақалоқнинг отаси Паул Симон Ригер ва онаси Карина Ригер бўлимга мурожаат қилиб, зарур ҳужжатларни тақдим этишди. ФҲДЁ органи томонидан қисқа фурсатда тегишли далолатнома ёзуви расмийлаштирилиб, ота-онага боланинг туғилганлиги ҳақидаги гувоҳнома топширилди. Бу нафақат оилавий қувонч, балки боланинг ҳуқуқий жиҳатдан давлат томонидан эътироф этилиши ва келажакда барча ижтимоий имтиёзлардан фойдаланиши учун ҳуқуқий асосдир.
Мутахассис сифатида таъкидлашим жоизки, туғилганликни ўз вақтида қайд этиш — бу шунчаки қоғозбозлик эмас, балки шахснинг жамиятдаги ҳуқуқий мавжудлигини тасдиқловчи энг муҳим ҳужжатдир. Бизнинг бўлимимиз томонидан хорижий фуқароларга хизмат кўрсатишда халқаро ҳуқуқ нормалари ва миллий қонунчилигимизнинг инсонпарварлик тамойилларига қатъий амал қилинмоқда. Бу эса Ўзбекистоннинг бағрикенг ва ҳуқуқий демократик давлат сифатидаги қиёфасини янада мустаҳкамлайди.
Хулоса ўрнида айтиш мумкинки, инсон қадрини улуғлаш, унинг ҳуқуқ ва манфаатларини ҳар қандай вазиятда ҳимоя қилиш Янги Ўзбекистон тараққиёт стратегиясининг асосий устунидир. Хорижий фуқаролар оиласида туғилган чақалоқнинг ҳужжатларини расмийлаштириш жараёни юртимизда қонун олдида барчанинг тенглиги ва инсон ҳуқуқлари олий қадрият эканини яна бир бор исботлайди. Зеро, ҳар бир бола, қаерда ва қайси миллат оиласида туғилишидан қатъи назар, эътибор ва ҳуқуқий ҳимояга лойиқдир. Биз каби соҳа ходимларининг асосий вазифаси эса бу ҳуқуқларнинг амалда, сифатли ва шаффоф тарзда таъминланишига хизмат қилишдан иборатдир.
Дилноза Раджабова,
Чилонзор тумани 2-сон ФҲДЁ бўлими 1-тоифали инспектори
