Ҳоким ва ёшлар: эртанги кун эгаларига юксак эътибор
Бугун мамлакатимизнинг ҳар бир гўшасида ёшлар билан ишлаш, уларнинг орзу-интилишларига қанот бўлиш давлат сиёсатининг устувор йўналишига айланган. Ҳар бир раҳбар, ҳар бир ҳоким учун кун тартибидаги энг муҳим масала — ёшлар овозини эшитиш ва уларнинг ташаббусларини қўллаб-қувватлашдир. Шу боис, Фарғона вилояти ҳокими Хайрулло Бозоров учун ҳам бугунги иш куни том маънода “Ёшлар куни” сифатида бошланди.
Вилоят раҳбари эрта тонгдан режаланган манзиллар сари йўл олиб, дастлаб Фарғона жамоат саломатлиги тиббиёт институти ҳузурида янги иш бошлаган замонавий кўп тармоқли клиникада бўлди. Бу ерда амалиёт ўтаётган бўлажак шифокорлар билан самимий мулоқот бўлиб ўтди. Талаба ёшлар ўз режа ва мақсадлари билан ўртоқлашар экан, тиббиёт соҳасида халқаро тажрибанинг ўрни нақадар муҳимлигини таъкидладилар. Хусусан, хориждаги нуфузли даволаш муассасаларида малака ошириш бўйича билдирилган таклиф вилоят ҳокими томонидан алоҳида эътибор билан тингланди ва ёшларни қизиқтирган барча саволларга батафсил жавоб берилди.
Куннинг навбатдаги муҳим манзили Фарғона туманидаги “Лоғон” маҳалласида жойлашган “Билимдон” болалар соғломлаштириш оромгоҳи бўлди. Бу ерда “Voice Up–2026” инклюзив ёшлар оромгоҳининг ҳудудий босқичи доирасида чинакам жўшқин муҳит ҳукмрон. Вилоят раҳбари билан учрашувда ёшлар 6 та йўналиш бўйича олиб борилаётган ишлар ва ўз лойиҳалари ҳақида маълумот бердилар. 50 нафар иштирокчининг ўз тақдимотларини муваффақиятли ҳимоя қилгани фарғоналик ёшларнинг интеллектуал салоҳияти нақадар юқори эканидан далолат беради.
Айниқса, учрашув давомида илгари сурилган ижтимоий ташаббуслар диққатга сазовор:
- Рақамли инклюзивлик: Кўзи ожиз ҳамда эшитиш ва нутқида нуқсони бўлган шахсларни жамиятга мослаштирувчи махсус мобил иловалар яратиш;
- Ижтимоий тадбиркорлик: Имконияти чекланган ёшлар учун дизайн ва тикувчилик йўналишида янги лойиҳаларни йўлга қўйиш;
- Волонтёрлик: Хайрия ва кўмак ишларини янги босқичга олиб чиқиш.
[gallery-28659]
Вилоят ҳокими ҳар бир таклифни қўллаб-қувватлар экан, инсон иродаси олдида ҳеч қандай тўсиқ бўлиши мумкин эмаслигини таъкидлади.
– Имконияти чекланган бўлишига қарамай, ҳар бир ёшда ўзига хос қобилият ва матонат бор. Сизнинг меҳнатингиз ва интилишингиз барча учун ибрат намунасидир. Биз бу салоҳиятни рўёбга чиқариш учун ҳар томонлама кўмак беришга тайёрмиз, — деди Хайрулло Бозоров.
Учрашув якунида ёшлар республика босқичида ҳам вилоят шарафини муносиб ҳимоя қилишга ваъда берди. Вилоят ҳокимининг ёшлар билан мулоқотлари кун давомида бошқа ҳудудларда ҳам давом этиб, янги ташаббусларга йўл очмоқда.
Зеро, ёшлар билан ўтказилган ҳар бир соат — эртанги ёруғ келажак учун қўйилган мустаҳкам пойдевордир.
Муҳаммаджон Обидов, ЎзА
