“Gemini” синов пайти 3 компанияни бузиб кирди
“Google” компанияси маълум қилишича, “Gemini” сунъий интеллект модели кибер хавфсизлик имкониятини текширишга қаратилган синов вақти ўзбошимчалик билан 3 компания тизимини бузиб кирган. Бу СИ ўта мустақил ҳаракатлангани билан боғлиқ илк ҳодиса сифатида баҳоланмоқда. Бу ҳақда BBC хабар берган.
“Google” вакили модель интернетдан очиқ маълумот топгани ва синовга алоқадор ҳисоблаган веб-сайтларга кириш учун пароль танлагани, бироқ ҳар бир ҳолатда тизимга киргач, ҳаракатни ўзи тўхтатганини таъкидлаган. Май ойида содир бўлган ушбу кибер ҳужум ҳақида жабрланган компаниялар хабардор қилинган.
Мазкур ҳодиса СИни ривожлантириш тезлиги ва жараённинг инсониятга эҳтимолий хавфи билан боғлиқ баҳсни янада авж олдирди. Кибер хавфсизликни баҳолаш билан шуғулланувчи “Irregular” мустақил компанияси томонидан ўтказилган синов июль ойидаёқ “Google” ва жабрланган томонларни огоҳлантирган ҳамда зарур хавфсизлик чораси кўрилган.
“Google” вакили Хизер Адкинс фикрича, бундай ҳодисалар кучли СИ моделини масъулият билан ишлашга ўргатиш нечоғли муҳимлигини кўрсатади.
Дарвоқе, бошқа етакчи СИ манбаларида ҳам шунга ўхшаш ҳолатлар кузатилган. Июль ойида “Anthropic” компаниясининг “Claude” модели синов муҳитидан чиқиб, 3 ташкилот тизимини бузиб кирган. “OpenAI” ҳам ўз моделлари очиқ хизматига бир неча бор ҳужум уюштирилганини билдирган.
“Microsoft” СИ бўйича раҳбари Мустафо Сулаймон рақобатчиларни тизимга инсон каби муносабатда бўлиш, жиловлаб бўлмайдиган технология яратиш хавфини туғдиришда айблади.
“Nvidia” ва “OpenAI” раҳбарлари тез орада Оқ уйда СИ хавфсизлиги ва жараённи тартибга солиш масаласини муҳокама қилиши кутиляпти.
Ф.Яхшибоева, ЎзА
