Эрон Ҳурмуздан ўтиш қоидасини бузган 56 кемани қора рўйхатга киритди
Эрон томонидан Ҳурмуз бўғозидаги қатновни тартибга солиш учун ташкил этилган Форс кўрфазини назорат қилиш бошқармаси (PGSA) белгилаган тартиб-қоидани бузганлиги учун яна 11 кемага чеклов жорий қилди. Шу тариқа қора рўйхатга тушган кемалар сони 56 тага етди.
Тузилма хабарида тегишли ҳужжат талабини бузган сув йўли транспорти воситалари кейинги гал бўғоздан ўтишга уринганда жаримага тортилиши, ушлаб қолиниши ёки мусодара қилиниши мумкинлиги таъкидланган. Бундан ташқари шу кемалар билан ҳамкорлик қилган бошқа компаниялар кемалари ҳам таъқибга учрайди.
2 сентябрь ҳолатига кўра, янгиланган рўйхатдан суюлтирилган газ ва хом нефть ташувчи танкерлар, жумладан БААдан “ADNOC Logistics” ва “Navig8” шўъба корхонаси, Саудия Арабистонининг “Bahri” компанияси кемалари ҳамда Хитойга алоқадор икки денгиз транспорти воситаси ўрин олган. 24 август куни Теҳрон сузиш қоидасини бузгани учун 45 танкерга нисбатан тақиқ эълон қилган.
АҚШ ва Исроил билан уруш шароитида Эрон Ҳурмуз орқали қатновни кескин чеклаган. 17 июнда эришилган келишувдан сўнг ҳаракатланишга вақтинча рухсат берилган эса-да, битим шарти бажарилмагани сабабли, 12 июль куни бўғоз қайта ёпилган эди.
Ф.Яхшибоева, ЎзА
