Эндокрин беморларга эътибор кучайтирилмоқда
Тошкент вилояти эндокринология диспансери мутахассислари томонидан вилоятда эндокрин касалликларга чалинган беморларни дори воситалари ва тиббий буюмлар билан таъминлаш борасидаги ишлар ўрганилмоқда.
Ўрганишлардан кўзланган асосий мақсад — эндокрин беморларга кўрсатилаётган тиббий хизматлар сифатини баҳолаш, зарур дори воситалари ва тиббий буюмларнинг ўз вақтида етказиб берилиши ҳамда улардан белгиланган тартибда фойдаланилишини таъминлашдан иборат.
Жойларда DMED тизими орқали скрининг ишларининг ташкил этилиши, эндокрин касалликларнинг энг кўп учрайдиган 6 та нозологияси бўйича беморларни йўналтириш, шунингдек, эндокрин беморларга берилаётган дори воситалари ва тиббий буюмларнинг ҳолати кўриб чиқилди.
Хусусан, барча турдаги инсулин препаратлари, йод воситалари, метформин, соматотроп гормони, десмопрессин каби дори воситаларининг мавжудлиги ва тарқатилишига алоҳида эътибор қаратилди. Шунингдек, беморларнинг кундалик назорати ва даволаниш жараёнида зарур бўладиган глюкометр, ланцет, тест-аппликаторлар ҳамда ТТГ, Т4, гликирланган гемоглобин, глюкоза, кетон, микроальбуминурия учун реактивларнинг тарқатилиши, сақланиши, қолдиғи ва яроқлилик муддатлари ўрганилди.
Ўрганишлар жараёнида дори воситалари ва тиббий буюмларни сақлаш шароити, уларнинг беморларга белгиланган тартибда етказиб берилиши ҳамда мавжуд захиралар ҳолатига ҳам эътибор қаратилмоқда.
Аниқланган камчиликлар юзасидан масъул ходимларга тегишли тушунтиришлар берилиб, уларни бартараф этиш бўйича амалий ёрдам кўрсатилди. Бундай ўрганишлар эндокрин касалликларни эрта аниқлаш, беморларни зарур мутахассисларга ўз вақтида йўналтириш ҳамда уларни дори воситалари ва тиббий буюмлар билан таъминлаш тизимини янада такомиллаштиришга қаратилган.
А.Мусаев,ЎзА
