ЕИ Украинани қўллаб-қувватлашда давом этишини ваъда қилди (+видео)
Европа Иттифоқи Киевни қўллаб-қувватлашда давом этишини ваъда қилди. Бу ҳақда Украина Мустақиллик куни муносабати билан Европа Кенгаши раиси Антониу Кошта эълон қилган баёнотда айтилган, деб хабар берди DW
Антониу Коштанинг таъкидлашича, Европа Иттифоқининг қарашлари фақат уруш даври билан чекланмайди. Унинг сўзларига кўра, Европа Иттифоқи Россияга нисбатан санкциялар босимини кучайтиришга тайёр.
«Россия урушни тўхтатмагунча, тинчликка чин дилдан интилаётганини кўрсатмагунча ва жанг майдонидан музокаралар столига ўтмагунча, биз босимни кучайтиришда давом этамиз», — деб ваъда берди Антониу Кошта.
Украина пойтахтига қатор жаҳон етакчиларининг, жумладан, Буюк Британия бош вазири Энди Бёрнемнинг келиши кутилмоқда. Бу унинг лавозимга киришганидан кейинги илк хорижий сафари бўлади.
Бёрнем Киевда Украина президенти Володимир Зеленский билан учрашишни режалаштирган. Йиғилишда бошқа европа етакчилари, жумладан, Германия канцлери Фридрих Мерц, Франция президенти Эммануэль Макрон, шунингдек, Антониу Кошта ҳамда Шимолий Европа ва Болтиқ бўйи мамлакатлари раҳбарлари ҳам иштирок этади. Уларнинг айримлари йиғилишда шахсан, бошқалари эса видеоконференция орқали масофадан қатнашади.
Кенжа Бекжонов, Анвархўжа Аҳмедов, ЎзА
