ЕИ Украинага кредит ажратиш шартларини кучайтиришни кўриб чиқмоқда
Экспертлар фикрича, Европа Иттифоқи томонидан шартларни кучайтириш эҳтимоли бир томондан молиявий интизомни оширишга қаратилган бўлса, иккинчи томондан Украина иқтисодиётига қўшимча босим келтириши мумкин.
ЕИ Украинага ажратилиши режалаштирилган молиявий ёрдамни янада қатъий шартлар билан боғлаш имкониятини муҳокама қилмоқда, деб ёзди “DW” нашри.
Маълум қилинишича, гап 2026–2027 йилларга мўлжалланган 90 миллиард евролик макроиқтисодий ёрдам пакети ҳақида бормоқда. Европа Комиссияси ушбу маблағнинг бир қисмини ажратишни Украинада бизнес учун солиқ сиёсатига ўзгартириш киритиш билан боғлашни кўриб чиқмоқда. Манбага кўра, мазкур ўзгариш ўлка ичида оммабоп бўлмаган қарорлар қаторига киради.
Қайд этилишича, кредит пакети 2025 йил декабрида келишилган бўлса-да, бир муддат Венгрия томонидан блоклаб келинган. Кейинчалик мамлакатдаги сиёсий ўзгариш ортидан масала илгарилади.
Д.Ҳакимов, ЎзА
