“Дўстлик-2026”: еттинчи бор ўтказилаётган қўшма ҳарбий ўқув машғулоти
Ўзбекистон ва Ҳиндистон ҳарбийлари тажриба алмашди.
Ўзбекистон ва Ҳиндистон ўртасидаги мудофаа соҳасидаги стратегик шериклик янги босқичга кўтарилмоқда. Наманган вилоятидаги “Ғурумсарой” дала-ўқув майдонида икки мамлакат қуролли кучларининг еттинчи бор ўтказилаётган “Дўстлик-2026” (Dustlik 2026) қўшма ҳарбий ўқув машғулотлари бўлиб ўтди.
Икки ҳафта давом этган ушбу машғулотларда икки давлатнинг сараланган ҳарбий бўлинмалари иштирок этди. Ҳиндистон контингенти таркибидаги 60 нафар ҳарбий хизматчининг 45 нафари Қуруқликдаги қўшинларнинг машҳур “Маҳар” полки вакиллари, 15 нафари эса Ҳарбий ҳаво кучлари ходимларидир. Ўзбекистон томонидан ҳам шунча миқдордаги Армия ва Ҳарбий ҳаво кучлари бўлинмалари жалб этилди. Эслатиб ўтиш жоизки, “Дўстлик” машғулотлари анъанавий равишда ҳар йили навбатма-навбат икки давлат ҳудудида ўтказиб келинмоқда. Маълумот учун, 2025 йилги машғулотлар Ҳиндистоннинг Пуна шаҳрида бўлиб ўтган эди.
Бу йилги ўқув-машқларининг асосий диққат маркази тоғли ва тоғолди ҳудудларда мувофиқлаштирилган ҳарбий ҳаракатларни олиб боришга қаратилди. Бундай рельеф ўзига хос тактик ва логистик қийинчиликларни туғдириши сабабли, ҳарбийлардан юқори жисмоний чидамлилик ва тезкор қарор қабул қилиш талаб этилди. Машғулотлар давомида терроризмга қарши кураш, ноқонуний қуролли гуруҳларни аниқлаш ва зарарсизлантириш бўйича қўшма махсус операциялар ўтказилди. Шунингдек, икки давлат ҳарбий бўлинмалари ўртасида ягона қўмондонлик ва назорат тизимини шакллантириш, ер усти навигацияси, душман базаларига шартли зарбалар бериш ва стратегик нуқталарни эгаллаш каби вазифаларга алоҳида урғу берилди.
Дала машғулотларидан ташқари, дастур доирасида назарий билим алмашиш сессиялари ҳам ташкил этилди. Унда томонлар ўзларининг жанговар тажрибалари, тактика ва усуллари билан ўртоқлашдилар. Бу йилги машғулотларда замонавий технологиялар ва янги авлод жанговар усулларини қўллашга алоҳида аҳамият қаратилганини таъкидлаш лозим. Ўқув машғулотларининг кулминацион нуқтаси 48 соатлик якуний синов машқлари бўлди. Унда реал жанговар вазиятга яқин сценарийлар асосида ҳарбийларнинг тайёргарлиги, алоқа тизимининг самарадорлиги ва қўшма ҳаракатларнинг аниқлиги синовдан ўтказилди.
“Дўстлик-2026” машғулотлари нафақат ҳарбий тайёргарлик, балки Ўзбекистон ва Ҳиндистон ўртасидаги ўзаро ишончни мустаҳкамлаш, минтақавий барқарорликни таъминлашда муҳим пойдевор бўлиб хизмат қилмоқда. Ҳарбий мутасаддиларнинг таъкидлашича, бу каби тадбирлар аскарлар ўртасида шахсий дўстлик ва касбий ҳурматни ошириб, икки стратегик шерикнинг хавфсизлик соҳасидаги интилишлари муштарак эканини яна бир бор намойиш этди.
ЎзА
