АҚШ–Эрон сулҳи узайтирилди, НАТО ва Россия ўртасида кескинлик, АҚШда йирик ўғрилик ва олимлар тақдири савол остида (+видео)
Путин Россияда барча «фронт учун» ишлаши кераклигини айтди
Дунё сиёсий майдонида кескинлик сақланиб қолмоқда. Дональд Трамп АҚШ ва Эрон ўртасидаги сулҳ муддати яна узайтирилганини маълум қилди. Унинг айтишича, 8 апрель куни эришилган ўт очишни тўхтатиш келишуви муддати тугаши арафасида сулҳ Покистон илтимосига кўра давом эттирилган. Бу қарор Шаҳбоз Шариф ва Асим Мунир мурожаатлари асосида қабул қилинган. Трамп, шунингдек, Ҳурмуз бўғозида блокадани сақлаб туриш ва ҳарбий шайликни давом эттириш топширилганини билдирган. Теҳрон эса музокараларнинг навбатдаги босқичида иштирок этишдан бош тортган.
Шу билан бирга, НАТО ва Россия ўртасида ҳам кескинлик кузатилди. НАТО самолётлари Болтиқ денгизи устида парвоз қилган Россия ҳарбий авиациясини тутиб қолган. Франция қўмондонлиги маълум қилишича, операцияда Рафале қирувчилари Швеция, Финляндия, Польша, Дания ва Руминия авиацияси билан ҳамкорликда иштирок этган. Россия томони эса бу парвозлар режали машғулот бўлганини таъкидлаган.
Владимир Путин эса Украинадаги уруш фонида бутун жамият «фронт учун» ишлаши зарурлигини билдирди. У Москвадаги чиқишида бу ҳолатни Иккинчи жаҳон уруши даври билан қиёслаб, нафақат ҳарбий саноат, балки аҳолининг барча қатламлари фронтни қўллаб-қувватлаши кераклигини айтди. Шу билан бирга, сўровларга кўра, Россияда тинчлик музокараларини қўллаб-қувватловчилар сони ошиб бормоқда.
АҚШда эса жиноятчилик билан боғлиқ йирик воқеа қайд этилди. Филадельфия шаҳрида икки нафар қуролланган шахс зирҳланган инкассатор машинасига ҳужум қилиб, 1,8 миллион долларни ўғирлаб кетган. Ҳодиса вақтида ҳеч ким жароҳат олмаган. Тергов ишларини Федерал қидирув бюроси олиб бормоқда, гумонланувчиларни қидириш бўйича кенг кўламли операция бошланган.
Яна бир шов-шувли ҳолат — АҚШда 11 нафар олимнинг ўлими ва бедарак йўқолиши текширилмоқда. АҚШ Конгресси аъзолари НАСА, Пентагон ва бошқа идораларга расмий сўров юбориб, ушбу ҳолатлар юзасидан изоҳ талаб қилди. Маълумотларга кўра, 2022 йилдан буён ядро физикаси ва космик тадқиқотлар билан шуғулланган камида 11 мутахассис ҳалок бўлган ёки бедарак йўқолган.
<iframe width="650" height="420" src="https://www.youtube.com/embed/-6P8ZgCM4Vc" title="AQSh–Eron sulhi uzaytirildi, NATO va Rossiya o`rtasida keskinlik, AQShda yirik o`g`rilik " frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Нозимбек Мардонов, Салим Обиджонов ЎзА
