“Aksilkorrupsiya xakatoni – 2026”: очиқ маълумотлар асосида яратилган энг яхши ечимлар аниқланди
Ёш дастурчилар учун коррупцияга қарши курашиш йўналишида инновацион ва амалий аҳамиятга эга креатив лойиҳалар танлови – “Aksilkorrupsiya xakatoni – 2026” юқори руҳда якунланди.
Танловнинг финал босқичида Коррупцияга қарши курашиш агентлиги директори Акмал Бурхонов коррупцияга қарши курашишда рақамли технологиялар ва очиқ маълумотларнинг аҳамияти тобора ортиб бораётганини алоҳида таъкидлади.
– Коррупцияга қарши курашишда нафақат муаммони кўра олиш, балки унга аниқ, технологик ва амалий ечимлар таклиф қилишнинг аҳамияти беқиёс, – деди А.Бурхонов. – Бу биз кутаётган энг муҳим натижа. Очиқ маълумотларга асосланган ёндашувлар шаффофликни таъминлайди, инсон омилини кескин қисқартиради ва жамоатчилик назоратини реал кучга айлантиради. Энди биз учун асосий вазифа – ушбу ғояларни реал тизимларга жорий этиш ва уларнинг кундалик ҳаётда самарали ишлашини таъминлаш.
Якуний босқичда 45 жамоа томонидан очиқ маълумотлар асосида ишлаб чиқилган дастурий маҳсулотлар экспертлар томонидан ҳар томонлама баҳоланди.
Танлов якунларига кўра, “Feba” жамоаси давлат харидларида коррупцияга қарши курашишга оид дастурий ечим билан 1-ўрин, “Austrum” жамоаси давлат хизматида манфаатлар тўқнашувининг олдини олишга қаратилган лойиҳа билан 2-ўрин, “Bright minds” жамоаси компьютер ўйини орқали болаларда коррупцияга нисбатан муросасиз муносабатни шакллантириш бўйича инновацион ёндашуви билан 3-ўринни эгаллади.
Ғолиб ва совриндорларга ташкилотчилар томонидан қимматбаҳо совғалар топширилди.
Коррупцияга қарши курашиш агентлиги томонидан ғолиб бўлган лойиҳаларни қўллаб-қувватлаш, уларни амалиётга жорий этиш ва кенг татбиқ қилишга ҳар томонлама кўмаклашилади.
Н.Абдураимова,
ЎзА
