Самарқанд қаласында Өзбекстан Республикасы Премьер-министрінің орынбасары – Инвестициялар және сыртқы сауда министрі Джамшид Ходжаев Шанхай ынтымақтастық ұйымының саммитіне қатысу үшін Өзбекстанға келген Иранның Мұнай министрі Джавад Авджиинмен келіссөздер жүргізді.

Кездесу барысында тәжірибе алмасу және кадрлық әлеуетті арттыру, мұнай-газ және мұнай-химия өнеркәсібі саласының қажеттіліктері үшін бірлескен кәсіпорындарда құрал-жабдықтарды өндіру мен жеткізуді ұйымдастыру сияқты салаларда ұзақ мерзімді және өзара тиімді ынтымақтастықты орнату перспективалары талқыланды.

Атап айтқанда, тараптар Өзбекстандағы мұнай өңдеу зауыттарын жаңғырту, мұнай-химия саласының қажеттіліктері үшін ең жоғары халықаралық стандарттарға жауап беретін катализаторлар шығару, бұрғылау қондырғыларын тиімді бағамен жеткізуді ұйымдастыру жобаларын бірлесіп жүзеге асыру мүмкіндіктерін қарастырды. Иран тарапы жобаларды жүзеге асыруға тікелей инвестиция тарту бойынша шаралар қабылдауға дайын екенін білдірді.

Бұл ретте мұнай-газ саласы қызметкерлерінің тәжірибесі мен біліктілігін арттыруды ескере отырып, ғылыми салада ынтымақтастық орнатудың келешегі де талқыланды. Иранның жетекші ғылыми-зерттеу орталықтарымен газ конденсаты және сұйытылған газ өндіру сияқты басым салаларда жұмыс істейтін кәсіпорындардың қызметкерлерін GTL технологиясы бойынша оқыту бағдарламасын бірлесіп әзірлеу туралы келісімге қол жеткізілді.

Келіссөздер соңында тараптар әріптестік қарым-қатынастарды жалғастыру және талқыланған жобалар мен бастамаларды жүзеге асыру бойынша «жол картасын» бірлесіп әзірлеуге келісті.