Futbol va mini futbol bo‘yicha o‘tkazilgan “DXX kubogi”ning Toshkent viloyati final bosqichi g‘oliblari aniqlandi.

Musobaqaning hududiy bosqichlarida 22 ta tuman-shahardagi 1 ming 25 ta mahallaning jamoalari o‘z imkoniyatlarini sinovdan o‘tkazdi. Musobaqalarda asosan 16 yoshdan 30 yoshgacha bo‘lgan yoshlar ishtirok etdi.

Final o‘yini Olmaliq shahridagi OKMK stadionida Bo‘ka tumanining Oltish va Yuqori Chirchiq tumanining Oqovul mahallalari yoshlari o‘rtasida bo‘lib o‘tdi. O‘yin Yuqori Chirchiq tumanining Oqovul jamoasining 2:1 hisobidagi g‘alabasi bilan yakunlandi.

Bo‘ka tumanida o‘tkazilgan sportning mini-futbol yo‘nalishidagi musobaqada ham Yuqori Chirchiq tumanining “Navbahor” MFY jamoasi Nurafshon shahrining “Qumariq” MFY jamoasi ustidan 7:3 hisobida g‘alabaga erishdi.

G‘oliblarga esdalik sovg‘alari topshirildi.  

Endi g‘olib jamoa Yuqori Chirchiq tumani yoshlari mazkur turnirning Respublika bosqichida qatnashib, Toshkent viloyati sharafini himoya qiladi.  

A. Musayev, O‘zA muxbiri