Токио ҳали ҳам Кунашир, Хабомаи, Шикотан ва Итуруп оролларининг кимга тегишли эканига аниқлик киритиш учун музокаралар олиб бориш ниятида, деб баёнот берди Япония бош вазири Фумио Кисида парламентда сўзга чиқиб.

"Сингапурда олий даражада эришилган келишув ҳамда ундан кейинги битимларни ҳисобга олган ҳолда ҳаракат қиламиз. Сингапурда 1956 йилда имзоланган қўшма декларация асосида музокараларни тезлаштириш ҳақида сўз борган эди. Ҳақиқатан ҳам ўшанда икки орол бўйича ишларни бошлаш айтилган эди, бироқ ҳукуматнинг позицияси ҳозир тўрт оролнинг ҳам кимга тегишли эканига аниқлик киритишдан ҳамда тинчлик шартномасини имзолаш бўйича музокараларни илдамлаштиришдан иборат", – деди Кисида.

Япониянинг уқтиришича, у Курил тизмасидаги тўртта оролга даъво қилишга ҳақли, гарчи Иккинчи жаҳон уруши якунлари бўйича ушбу ороллар собиқ СССР ҳудудига айланган бўлсада. Москва эса ўша ороллар устидан Россия суверенитети ўрнатилгани ва буни ўзгартириб бўлмаслигини таъкидлайди.