Америка Құрама Штаттарының халықаралық даму агенттігі (USAID) адам саудасымен күрес жөніндегі Самарқанд кіші комиссиясымен және «Istiqlal Avlodi» үкіметтік емес ұйымымен бірлесіп мигранттар мен мигранттардың отбасыларына арналған екінші ақпараттық-кеңес орталығын ашты.

Бұл орталық еңбек мигранттарын шетелде адам саудасының алдын алу үшін ақпарат береді. Сондай-ақ елге оралған мигранттар мен олардың отбасы мүшелеріне құқықтық кеңес, психологиялық қызмет көрсетеді және мигранттарды кәсіптік оқытуды ұйымдастырады.

Орталықтың ашылу салтанатында сөз сөйлеген USAID-тің Өзбекстандағы миссиясының Демократия және басқару бөлімінің басшысы Фей Хазелкорн халықаралық агенттік, Өзбекстан үкіметі және азаматтық қоғам арасындағы ынтымақтастықты оң бағалаған.

Халықаралық агенттік 2022 жылдың наурыз айында Жызақта мигранттар мен мигранттардың отбасыларына арналған алғашқы ақпараттық-кеңес беру орталығын ашқан еді. Мәліметтерге сәйкес, орталық содан бері адам саудасының әлеуетті құрбандары мен мигранттардың отбасыларынан түскен 120-ға жуық өтінішті қарап, адам саудасының 16 құрбанына елге оралуға көмектескен. 

2005 жылдан бері АҚШ үкіметі Өзбекстандағы адам саудасы туралы ақпараттандыруды арттыру және құрбандарға көмек көрсету үшін USAID арқылы 9,6 миллион доллардан астам қаржы бөлген.