Ташкенттегі Өзбекстан өнер академиясының Орталық көрме залында «Ташкент-2023» II халықаралық мүсін симпозиумы өтуде.

Экология, қоршаған ортаны қорғау және климаттың өзгеруі министрлігінің хабарлауынша, II Халықаралық мүсін симпозиумын Өзбекстанның Құрылыс және тұрғын үй-коммуналдық шаруашылық министрлігі мен Өзбекстан Көркемсурет академиясының Суретшілер одағы ұйымдастырды.

«Бұл симпозиум мүсін өнері арқылы халқымыздың санасында экология мен қоршаған ортаны қорғау тақырыбын тереңдетуге қызмет етеді. Сонымен бірге Ташкент қаласының мәдени ортасы мен көркем ландшафттық бейнесін дамыту мақсатында мәрмәр мүсіндік туындыларын жасауға қолайлы жағдай туғызу, шетелдік мүсіншілермен тиімді шығармашылық ынтымақтастық орнату, тәжірибе алмасу көзделуде», - деді Азиз Абдухакимов. 

Биылғы симпозиумға Ұлыбритания, Италия, Испания, Аргентина, Үндістан, Түркия, Иран, Ресей, Грузия және Беларусь елдерінен 10 шетелдік және 11 өзбекстандық мүсінші қатысуда.

Симпозиум барысында тәжірибелі мүсіншілер урбанизация, «жасыл» даму, климаттың өзгеруі, Арал трагедиясының зардаптары туралы монументалды және сәндік туындылар жасайды. Сондай-ақ, жергілікті жастар үшін шетелдік және жергілікті кәсіби мүсіншілердің қатысуымен «шеберлік сыныптар» ұйымдастырылып, экотуристік нысандарда, демалыс саябақтарында, «жасыл саябақтарда» экологиялық насихат ескерткіштері орнатылады. Симпозиум жұмысы бір айға жалғасады.

Еске салар болсақ, бірінші халықаралық мүсін симпозиумы 2022 жылы Самарқандта өткен еді.