Исроилнинг Қуддус шаҳрида шахмат бўйича дунёнинг 12 та энг кучли терма жамоалари иштирокида навбатдаги жаҳон чемпионатига старт берилди.

Кеча кун мобайнида ҳар иккала гуруҳдаги дастлабки ўйинлар бўлиб ўтди.  

Ўзбекистон терма жамоаси жой олган “Б” гуруҳининг 1-турида қўйидаги натижалар қайд этилди.

Ҳиндистон-Исроил-2:2, Польша-АҚШ-1½-2½, Озарбайжон-Ўзбекистон-2½-1½.  

Мусобақанинг 2-турида ҳамюртларимиз Исроил терма жамоаси билан рўбарў келди. Шиддатли ўтган басҳда ҳамюртларимиз 2½ -1½ ҳисобида зафар қучди. Қолган учрашувларда Озарбайжон АҚШ жамоасини 3:1 ҳисобида доғда қолдирган бўлса,  Ҳиндистон Польша “дуэли”да муроса йўли танланди -2:2.  

Якунланган иккита тур натижаларига кўра, 5½ очкога эга Озарбайжон жамоаси пешқадамлик қилмоқда. Ҳамюртларимиз ҳамда Ҳиндистон жамоалари 2 очкога эга бўлган ҳолда кейинги поғоналарни банд этиб турибди. Улардан кейинги ўринларда бораётган АҚШ 2 очкога, Польша ва Исроил жамоалари бир очкога эга.  

Чемпионатнинг “В” гуруҳидаги ўйинларда Хитой ва Украина жамоалари 4 очко билан олдинда бормоқда. Кейинги қаторлардан эса Франция(2), Испания(2), Нидерландия(0) ҳамда Жанубий Африка Республикаси жой олган.  

Бугун, 21 ноябрь куни чемпионатнинг 3 ва 4-тур баҳслари ташкил этилади. Мамлакатимиз шахматчилари 3-турда АҚШ вакиллари билан куч синашса, 4-турда Ҳиндистон шахматчиларига қарши дона суради.  

Тўлқин Рўзиев,  

ЎзА