Вашингтон музокаралари, кўмак давом этади…

«CNN» телеканали ўз манбаларига таяниб, Украина Президенти Владимир Зеленский Вашингтонга кетаётгани тўғрисида хабар берди.

Аввалроқ «Axios» агентлиги 21 декабрда АҚШ Конгресснинг Сенати ва Вакиллар палатасининг қўшма мажлисида нутқ сўзлашини маълум қилган эди. Зеленский ўз чиқишида қонунижодкорларини Киевга бераётган ҳарбий ёрдамга миннатдорлик билдириши ва молиявий кўмакни кўпайтиришни сўраши ҳақида гапиради, деб тахмин қилган.

Бундан ташқари, Украина раҳбари АҚШ Президенти Жо Байден билан учрашиши кутилаётгани айтилади.

Яқин кунлар ичида БМТнинг Бош Ассамблеяси махсус сессиясида Украина масаласини кўриб чиқиш бўйича таклиф келиб тушмади. Бош Ассамблеянинг 77-сессияси раиси расмий вакили Полина Кубияк бу ҳақда маълум қилди.

Шунингдек, БМТ Бош котибининг расмий вакили Стефан Дюжаррик Зеленскийнинг халқаро ташкилотга ташрифи ҳақида маълумотга эга эмаслигини айтиб ўтди.

Украинада узоқ давом этаётган ва кескинлашаётган инқироз ҳеч кимнинг манфаатига тўғри келмайди. Бу ҳақда Хитой раиси Германия Президенти Франк-Вальтер Штайнмайер билан бўлиб ўтган суҳбат чоғида айтиб ўтди.

«Хитой тинчлик музокараларига кўмаклашиш тарафдори ва инқирозни чўзиш ҳамда кучайтириш барча томонлар манфаатларига мос келмайди», деб ҳисоблайди Си Цзиньпин.

«Yomiuri»нинг хабарига кўра, Япония ҳукумати Украинага миналардан тозалаш, сапёрларни тайёрлаш, уларга миналарни қидириш учун асбоб-ускуналар билан таъминлаш  ишида ёрдам беришни режалаштирмоқда.

Японлар сапёрлар тайёрлаш ишида бой тажрибага эга Камбоджа билан ҳамкорликда ишлашни режаламоқда. Келаси йилнинг баҳорида Польша ва Пномпенда сапёрларни ўқитиш бошланади, шундан кейин Япония Киевга мина қидириш ускуналарини жўнатади.

Франция Президенти Эммануэль Макрон россиялик ҳамкасби Владимир Путин билан анчадан бери суҳбатлашмаганини тасдиқлади. «LCI» ва «TF1» телеканалларига берган интервьюсида ҳозир шундай телефон мулоқотига тайёргарлик кўраётгани, ундан аввал эса МАГАТЭ раҳбари Рафаэль Гросси ва Зеленский билан суҳбатлашиб олиши ҳақида гапирди.

Унинг сўзларига кўра, Путин билан мулоқот чоғида «Украинадаги фуқаролик инфратузилмасининг, хусусан, Запорожье АЭСнинг ядровий хавфсизлиги» масаласини муҳокама қилишини маълум қилди.     

Макроннинг таъкидлашича, «Бизнинг Украинага ҳарбий ёрдамимиз хавфсизлик кафолатини таъминлашга қаратилган. Бу кўмаклар вазиятни янада таранглаштириш учун қилинмаяпти», деб қайд этди.  

Жаҳон банки «кечиктириб бўлмас зарурий эҳтиёжларини қондириш учун» Украинага 610 миллион доллар ажратиш тўғрисидаги хабарни банкнинг матбуот хизмати тарқатди.

Финляндиянинг Украинага навбатдаги 28,8 миллион евро миқдоридаги ҳарбий асбоб-ускуналар етказиб бериши тўғрисидаги ҳукумат қарори ҳақида мамлакат мудофаа вазирлиги хабар берди.

«Бу Хельсинкининг февраль ойидан бери ўн биринчи ёрдам пакети бўлиб, уларнинг миқдори 189,2 миллион еврога етгани» айтилади.

Аброр ХОН, ЎзА