Бухоро вилояти қон қуйиш станцияси томонидан “Мен донорман!” акцияси мунтазам ўтказиб келинмоқда. Шу билан бирга станциянинг моддий-техник имкониятларини яхшилашга эътибор қаратилмоқда. Наврўз байрами шодиёнаси кунларида вилоят қон қуйиш станциясига кўчма донорлик комплекси топширилди.

–Бугунгача вилоятда махсус кўчма донорлик комплекси йўқлиги даволаш ишларини тезкор, самарали ва сифатли ташкил этишда муайян қийинчилик ва тўсқинликларни келтириб чиқараётган эди, – дейди вилоят қон қуйиш станцияси бошлиғи Нодир Тўраев. – Ҳаракатдаги мобиль донорлик мажмуи эса албатта, кейинги йилларда юртимизда ноёб юрак операциялари, инсон тана аъзоларини кўчириб ўтказиш билан боғлиқ мураккаб жарроҳлик амалиётларининг йўлга қўйилиши сабабли сифатли қон компонентларига бўлган талаб ва эҳтиёжни қондириш учун амалга оширилган яна бир янгилик.

Вилоятга тақдим этилган “ISUZU”—“HC-40” русумли автотранспорт воситасида тайёрланган кўчма донорлик мажмуаси махсус кроват, музлаткич, гемоконтейнер, ҳавони тозалаш учун мўлжалланган бактериоцид лампа, кондиционер билан жиҳозланган бўлиб, бир вактнинг ўзида 3 нафар донордан қон олишга мўлжалланган.

Аҳоли орасида қон донорлиги аҳамиятини кенг тарғиб қилиш, беғараз донорликни ривожлантириш бўйича волонтёрлик ҳаракатини оммалаштириш, сайёр донорлик кўламини кенгайтиришга доир мунтазам чора-тадбирлар амалга ошириб келинади. Қолаверса, республикада қон билан ишлаш хизмати муассасалари фаолиятини янада такомиллаштириш ва аҳоли орасида беғараз донорлик ҳаракатини ривожлантиришга доир 2022­-2025 йилларга мўлжалланган дастур ишлаб чиқилган. Шундан келиб чиқиб, мобиль кўчма донорлик комплекси станциясининг сайёр гуруҳи тиббий ходимларининг ҳудудлар, шаҳар ва туманлардаги тиббиёт бирлашмаларидан сифатли қон компонентларини йиғиш ишларини амалга оширишда, албатта, маҳаллий аҳоли ва улар хизматидаги тиббиёт ходимларига юқори даражадаги қулайлик яратди.

Маълумот учун, Ўзбекистон Республикаси Президентининг 2022 йил 9 августдаги “Республикада қон билан ишлаш хизмати муассасалари фаолиятини янада такомиллаштириш ва аҳоли орасида беғараз донорлик ҳаракатини ривожлантириш чоралари тўғрисида” ги қарорига кўра, 2022-2024 йиллар давомида республикада қон билан ишлаш хизмати муассасаларини 15 та цитаферез аппарати, 15 та қонни қайта ишлаш учун рефрижераторли центрифуга, 7 та тезкор контактли музлаткич, 15 та тўлиқ автомат иммунофермент (ИФА/ИХЛА) анализатори, 14 та ПЗР анализатори ва 13 та мобиль-кўчма донорлик комплекси билан жиҳозлаш кўзда тутилган.  

Зариф Комилов,  

ЎзА