7 желтоқсанда Өзбекстан Республикасы Президенті Шавкат Мирзияев Біріккен Ұлттар Ұйымының терроризмге қарсы күресте адам құқықтары мен негізгі бостандықтарын ілгерілету және қорғау жөніндегі арнайы баяндамашысы Фионнуала Ни Аолайнды қабылдады.

Жетекші халықаралық құрылымның жоғары деңгейдегі өкілі Мемлекет басшысының БҰҰ Бас Ассамблеясының 75-сессиясында айтқан бастамалары мен ұсыныстарын жүзеге асыру аясында Өзбекстанға сапармен келіп отыр.

Кездесуде адам құқықтары саласындағы ашық және сындарлы диалогты одан әрі дамыту мәселелері, қазіргі заманғы қауіптер мен сын-қатерлерге қарсы іс-қимыл бойынша ағымдағы күн тәртібі талқыланды.

Атап айтқанда, Өзбекстан БҰҰ-ның Адам құқықтары жөніндегі кеңесінің (АҚК) толыққанды мүшесі болып, оның жұмысына белсенді қатысуда. Келер жылы осы мамандандырылған институттың басқару органдарына Өзбекстан тарапы қатысады.

Адам құқықтары жөніндегі ұлттық стратегия аясында елімізде гендерлік теңдікті, сөз және діни сенім бостандығын қамтамасыз етуге, азаматтық қоғамды дамытуға бағытталған шаралар белсенді түрде жүзеге асырылуда.

БҰҰ-ның Мүгедектер құқықтары туралы конвенциясы ратификацияланды. Өзбекстанның бастамасы бойынша АҚК-ның пандемия кезінде жастардың құқықтарын қорғау туралы қарар қабылдады және тиісті конвенция әзірленуде.

Қауіпсіздік саласында бірқатар негізгі заңдар қабылданып, жақында экстремизм мен терроризмге қарсы күрестің бес жылдық стратегиясы бекітілді.

Арнайы баяндамашы Өзбекстанның «Мехр» операциясы аясында азаматтарды елге қайтару, реабилитациялау және реинтеграциялау жөніндегі күш-жігерін жоғары бағалап, терроризм мен экстремизмге қарсы күрестің жаңа тәсілдеріне тоқталды.

Кездесу барысында тығыз ынтымақтастықты нығайтуға, ең алдымен азаматтық қоғам институттарының рөлін күшейтуге, әйелдер мен жастардың рөлін арттыруға, заңнаманы жетілдіруге және басқа да салалардағы бағдарламалар мен жобаларды жүзеге асыруда техникалық көмек пен қолдауды жалғастыруға ерекше назар аударылды.

Өзбекстанның БҰҰ агенттіктерімен және адам құқықтарын қорғау институттарымен серіктестігін нығайтуға бағытталған бірқатар бірлескен халықаралық іс-шараларды өткізу келісілді.