Франция президенті Эммануэль Макрон Қытаймен қарым-қатынасты ушықтырмау үшін Токиода НАТО өкілдігін ашу туралы ұсынысқа қарсы шықты.

Макронның: «Егер біз НАТО-ның ауқымы мен географиясын кеңейтуге тырыссақ, үлкен қателік жібереміз» деген сөзі келтірілген Financial Times хабарында.

Басылымның жазуынша, Париж Альянс қызметінің ауқымын «Солтүстік Атлантика» аясында қарастырады.

Франция «НАТО мен Қытай арасында шиеленіс тудыратын» кез келген қадамды қолдамайды. Атап айтқанда, қосымша кеңсе ашу Қытайдың Украина мәселесіне деген сеніміне нұқсан келтіруі мүмкін.

Бұған дейін НАТО бас хатшысы Йенс Столтенберг Токиода Солтүстік Атлантикалық альянстың кеңсесін ашу күн тәртібінде тұрғанын растаған. Жапония премьер-министрі Фумио Кисида да бұл мәселенің қарастырылып жатқанын хабарлады.