Самарқанд вилоятининг Каттақўрғон туманида йилига 3 миллион тонна цемент ишлаб чиқариш қувватига эга “HENGYUAN CEMENT” хорижий корхонаси фаолият бошлади.

Шу муносабат билан ўтказилган тадбирда Самарқанд вилоят ҳокими Эркинжон Турдимов ва хитойлик ҳамкорлар сўзга чиқиб, Ўзбекистон ва Хитой ўртасидаги ҳамкорлик алоқалари кейинги йилларда изчил ривожланиб бораётганини таъкидлади. Хусусан, куни кеча Самарқандга ташриф буюрган Цзянсу провинцияси раҳбарияти билан учрашувда ушбу минтақа тадбиркорларига Каттақўрғонда зарур шарт-шароит яратиб берилиши маълум қилинди.

Ўз навбатида хитойлик инвестор 351 миллион АҚШ доллари миқдорида тўғридан-тўғри хорижий инвестиция маблағлари жалб қилиниб, амалга оширилган мазкур лойиҳа Каттақўрғондаги ишларнинг дастлабкиси ва келгусида яна бошқа корхоналар ташкил этиш ниятида эканлигини маълум қилди.  

38,5 гектар майдонда бунёд этилган корхонага Хитойдан замонавий ускуналар келтирилди. Заводнинг йиллик экспорт қуввати 82 миллион долларни ташкил қилиб, Европа ва бошқа давлатларига йўналтирилади.  

Муҳими, янги корхона иш бошлаши билан 600 та янги иш ўрни яратилди.

[gallery-13727]

Ғ.Ҳасанов, А.Исроилов (сурат), ЎзА